Azərbaycan, Bakı,21 iyul / Trend , müxbir K.Zərbalıyeva/ "Azadlıq" qəzetinin müxbiri Aqil Xəlilovun, onu bıçaqlamaqda ittiham olunan Sergey Strekalinin barəsindəki məhkəmə prosesi ilə bağlı yaydığı məlumatlar əsassızdır.
Bunu bazar ertəsi Strekalinin vəkili Akif Məlikov keçirdiyi mətbuat konfransında deyib.
Trend -un Arayışı: "Azadlıq" qəzetinin müxbiri Aqil Xəlilov bu il martın 13 -də Ayna Sultanova küçəsi 523 -ci məhəllədə yerləşən binalardan birinin yaxınlığında naməlum şəxslər tərəfindən bıçaqlanıb.
Hadisə baş verən gündən Aqil Xəlilov hadisənin əvvəllər "Zeytun bağı"adlanan sahədə baş vermiş insidentlə və jurnalist fəaliyyəti ilə bağlı olmasını, iki nəfər şəxs tərəfindən izlənildiyini bildirib.
Baş Prokurorluğun yaydığı məlumatda isə, jurnalistin qeyri-ənənəvi cinsi orientasiyalı şəxslər tərəfindən bıçaqlandığı bəyan edilib.
Belə ki, Xəlilovun əvvəllər tanıdığı və onunla intim əlaqədə olmuş Serqey Strekalin tərəfindən bıçaqlandığının istintaqla sübuta yetirildiyi qeyd olunub.
Sergey Strekalin Cinayət Məcəlləsinin qəsdən sağlamlığa az ağır xəsarət yetirmə (127.1) və satış məqsədi olmadan qanunsuz olaraq narkotik vasitələri əldə etmə və saxlama (234.1) maddələri ilə təqsirli bilinərək, həbs olunub.
Jurnalistin "Zeytun bağı" adlanan ərazidə döyülməsi faktı ilə bağlı başlanmış cinayət işinə isə, xitam verilib.
Bakının Nəsimi rayon məhkəməsinin hökmü ilə Strekalinə 1 il 6 ay azadlıqdan məhrum etmə cəzası verilib.
Vəkil bildirib ki, Strekalin Xəlilovla 2005 -ci ildə tanış olub və tanış olduğu gündən o, özünü jurnalist kimi qələmə verib. "Halbuki, həmin vaxt Xəlilov jurnalist deyildi. O, bu ilin yanvarından "Azadlıq" qəzetində müxbir kimi işləyir",-deyə vəkil vurğulayıb.
Məlikov deyib ki, Xəlilov ilk tanışlıqlarında Strekalinə intim əlaqədə olmağı təklif edib. Strekalin isə bu təklifi rədd edib. "Strekalin deyib ki, mən kişilərlə passiv yox, aktiv əlaqədə olanam",-deyə vəkil bildirib.
Müdafiəçinin sözlərinə görə, Xəlilov bu təklifini Strekalinə il ərzində göndərdiyi 1000 -dən artıq mesajda da bildirib.
Vəkil Strekalinlə bağlı hökmdən apellyasiya şikayəti verəcəyini deyib.
Şikayət hökmün Strekalinin satış məqsədi olmadan qanunsuz olaraq narkotik vasitələri əldə etmə və saxlama (234.1) maddəsi epizodundan veriləcək.
Vəkil deyib ki, Strekalin massajistdir və heç vaxt narkotika qəbul etməyib. Məlikov həmin narkotikanın , Strekalinin mənzilinə evinə gələn iranlı müştərisi tərəfindən atıldığını iddia edir.
Xəlilov məhkəmədə ifadəsində Strekalin tərəfindən bıçaqlanmadığını, istintaqın qərəzli, qeyri-obyektiv aparıldığını bildirib.
Jurnalist bıçaqlanmasını peşə fəaliyyəti ilə əlaqədar olduğunu bəyan edib və işin obyektiv araşdırılmasını tələb edib.
Müəlliflə əlaqə saxlamaq üçün elektron ünvan - [email protected]
