Azərbaycan, Bakı, 22 oktyabr / Trend , müxbir K.Zərbalıyeva/ Bakıda polisi qətlə yetirən şəhər sakininin məhkəməsi başlayıb. Ağır Cinayətlərə Dair İşlər üzrə Məhkəmədə çərşənbə günü bu il mayın 29-da Suraxanı rayon Polis İdarəsinin 30-cu polis bölməsinin əməkdaşı, baş leytenant Ramin Zamanovu qətlə yetirməkdə ittiham olunan Seymur Əliyevin işi üzrə hazırlıq iclası keçirilib. İş üzrə məhkəmə baxışı oktyabrın 29-na təyin olunub.
Suraxanı rayon Polis İdarəsinin əməkdaşları avtomobil hissələrinin oğurluğunda şübhəli bilinən Əliyevin tutulması ilə bağlı mayın 29-da Binəqədi rayonu 28 May qəsəbəsində əməliyyat tədbirləri keçirən zaman Əliyev polisə odlu silahdan atəş açıb. Polis əməkdaşı Zamanov aldığı xəsarətdən hadisə yerində keçinib.
Əliyevə qarşı Cinayət Məcəlləsinin qanunsuz olaraq odlu silah, onun komplekt hissələrini, döyüş sursatı, partlayıcı maddələr və qurğular əldə etmə, başqasına vermə, satma, saxlama, daşıma və gəzdirmə (228), qəsdən adam öldürmə (120.1), hakimiyyət nümayəndəsinə qarşı müqavimət göstərmə və ya zor tətbiq etmə (315) maddələri ilə cinayət işi açılıb.
Müəlliflə əlaqə saxlamaq üçün elektron ünvan- [email protected]