Azərbaycan, Bakı, 24 noyabr / Trend , müxbir K.Zərbalıyeva/ Azərbaycanda cəza çəkən 20 iranlı məhkum ölkəsinə təhvil verilib. Bu haqda bazar ertəsi Trend - a Ədliyyə Nazirliyinin Beynəlxalq Əməkdaşlıq İdarəsindən rəisi Zavər Qafarov məlumat verib.
Azərbaycan cəzaçəkmə müəssisələrində 513 əcnəbi məhkum cəza çəkir və onların böyük əksəriyyəti İran, Rusiya və Gürcüstan vətəndaşlarıdır.
Qafarov Azərbaycanda 130 iranlı məhkumun cəza çəkdiyini bildirib və qeyd edib ki, onların böyük qismi narkotika cinayətlərinə görə məhkum olunanlardır.
Bu ilin 10 ayında xaricdə cəza çəkən 111 Azərbaycan vətəndaşı və Azərbaycanda cəza çəkən 39 əcnəbi məhkum ölkələrinə verilmələrilə bağlı müraciət ediblər. Cari ilin ötən dövründə müxtəlif ölkələrdən 33 məhkum cəzalarının qalan hissəsinin çəkilməsi üçün qəbul edilib, 17 məhkum təhvil verilib.
2005 - ci ildən bəri Azərbaycanda cəza çəkən 76 əcnəbi məhkum cəza çəkmək üçün öz ölkəsinə təhvil verilib, xarici ölkələrdə cəza çəkən 151 azərbaycanlı məhkum qəbul edilib.
Məhkumların verilməsi ilə bağlı Azərbaycanın İran, Rusiya, Gürcüstan, Ukrayna, Qazaxıstan, Özbəkistan, Qırğızıstan ilə ikitərəfli müqavilələri var.
Azərbaycan "Azadlıqdan məhrumetməyə məhkum olunmuşların cıəzalarının qalan hissəsini çəkmək üçün təhvil verilməsi haqqında" Moskva, "Məhkum olunmuş şəxslərin verilməsi haqqında" Avropa Konvensiyalarının iştirakçısıdır.
Məqalə müəllifi ilə əlaqə ünvanı:[email protected]