Azərbaycan, Bakı,
15 yanvar / Trend , müxbir
K.Zərbalıyeva/ "Sağlam
Gələcək Uğrunda" İctimai Birliyi Avropa İnsan
Hüquqları Məhkəməsinə şikayət göndərib.
Bu məlumat Trend -a cümə axşamı Hüquq
Maarifçiliyi Cəmiyyətindən verilib.
Birlik 14 may 2008-ci il tarixdə təsis edilib, əsas məqsədi Naxçıvan Muxtar Respublikasında əhali, xüsusilə də gənclər arasında sağlam həyat tərzinin təbliği, HİV/AİDS və onu törədən fəsadlarla bağlı maarifləndirmə işlərinin aparılması, bu xəstəliklərdən əziyyət çəkən insanların hüquqlarının qorunması, qanunvericiliklə qadağan olunmayan digər tədbirlər görməkdir.
Ərizəçi -- Birliyin təsisçisi Məhəmməd Rzayev İnsan hüquqlarının və əsas azadlıqlarının müdafiəsi haqqında Avropa Konvensiyasının ədalətli məhkəmə araşdırması hüququ (6-cı) , yığıncaqlar və birləşmək azadlığının (11-ci) pozuntusunun tanınmasını Avropa Məhkəməsindən xahiş edir.
2008-ci il mayın 23 - də
təşkilatın dövlət qeydiyyatına alınması
üçün, Birliyin təsis sənədləri poçt
vasitəsilə Naxçıvan Muxtar Respublikasının
Ədliyyə Nazirliyinə təqdim edilib. Lakin ərizəçiyə
bu günədək heç bir cavab verilməyib.
Birliyin təsisçisi Məhəmməd Rzayev
Naxçıvan MR Ədliyyə Nazirliyinin
hərəkətsizliyinin qanunsuz hesab edilməsi tələbi
ilə 2008- ci il iyulun 15 - də Naxçıvan
şəhər Məhkəməsinə müraciət edib.
Naxçıvan Şəhər Məhkəməsi təqdim
edilən şikayətlə bağlı bugünədək
ərizəçiyə heç bir cavab verməyib.
Avropa Məhkəməsi yığıncaqlar və birləşmək azadlığının pozuntusu ilə bağlı indiyədək Azərbaycana qarşı 4 qərar çıxarıb.
Məqalə müəllifi ilə əlaqə ünvanı:[email protected]