Azərbaycan, Bakı, 17 dekabr /Trend, müxbir M.Əliyev/
Avropa İttifaqı kənd təsərrüfatı sahəsi üzrə kadr hazırlığı prosesinin təkmilləşdirilməsi üçün 2011-ci ildə Azərbaycana 1,2 milyon avro miqdarında qrant ayıracaq. Bu barədə Trend-ə Təhsil Nazirliyinin Texniki peşə təhsili şöbəsinin müdiri Namiq Məmmədov bildirib.
Onun sözlərinə görə, Avropa İttifaqının Tvinninq Proqramı çərçivəsində həyata keçiriləcək layihə kənd təsərrüfatı istiqaməti üzrə ilk növbədə ixtisaslı kadrların hazırlanmasını nəzərdə tutur.
"Layihə çərçivəsində Azərbaycanda əmək bazarı təhlil olunacaq və bu təhlillərə əsasən seçilmiş müəyyən ixtisaslar üzrə peşə kurikulumları hazırlanacaq", - Məmmədov bildirib.
Azərbaycanda Tvinninq Proqramının icrasına 2004-cü ildə başlanılıb. Hazırda Tvinninq layihələri Aİ-nin Avropa Qonşuluq Siyasətini həyata keçirməyə razılıq vermiş ölkələrdə (Aralıq dənizi ölkələri, Ukrayna, Moldova və Cənubi Qafqaz ölkələrində) tətbiq olunmağa başlanılıb.
Hazırda Azərbaycanda 107 peşə təhsili müəssisəsi fəaliyyət göstərir. Onlardan 47-si peşə liseyi, 60-ı isə peşə məktəbidir.
