Azərbaycan, Bakı, 3 fevral /Trend, müxbir A.Axundov/
Türkiyə Mədəniyyət və Turizm Nazirliyi İstanbulu Azərbaycan, Səudiyyə Ərəbistanı, Yunanıstan, Rumıniya, Suriya və İraq vətəndaşlarının ən çox gəldiyi şəhərə çevirməyi qarşısına məqsəd qoyub. Bu barədə cümə axşamı Trend-ə Türkiyənin mədəniyyət və turizm naziri Ərtoğrul Günay deyib.
Onun sözlərinə görə, bu məqsədə çatmağa bu ölkələrdə reklam fəaliyyəti və ilkə dəfə olaraq 2011-ci il martın 18-dən aprelin 26-dək keçiriləcək "İstanbul shoping" festivalı kömək edəcək.
"Festival vasitəsilə İstanbul yeni ticarət və əyələncə mərkəzi olacaq, turistlərin xərcləri isə beş il ərzində beş dəfə, 12 il ərzində 13 dəfə artacaq. 2011-ci ildə pərakəndə satışın həcmi 2 milyard dollar təşkil edəcək, 2023-cü ildə 10 milyard dollara çatacaq. Festival çərçivəsində xarici turistlər güzəştlər mövsümü olmayan dövrlərdə 50 faiz güzəştlə alver edə, eləcə də vergi ödəmədən ticarət apara biləcəklər", - Günay bildirib.
Onun sözlərinə görə, Türkiyədə ən çox turistləri olan ölkələrin ilk "onluğu"nun yarısını qonşu ölkələr təşkil edir, İran və Rusiya isə ilk "dördlüy"ə daxildir.
"Türkiyə son illər turizm sektorunda çox böyük sıçrayış edib", - Günay vurğulayıb.
Günayın sözlərinə görə, Türkiyə və Azərbaycan turizmə investisiyalar və turizm kadrlarının hazırlanması sahəsində əməkdaşlıq edir.
"Hər il Türkiyə Mədəniyyət və Turizm Nazirliyinin əməkdaşlığı ilə Azərbaycanın turizm sektorunun müxtəlif sahələri üzrə tədris prqoramı hazırlanır", - Günay qeyd edib.
Onun sözlərinə görə, Türkiyə və Azərbaycan arasında turizm sahəsində münasibətlər 1992-ci ildə turizm əməkdaşlığına dair saziş imzalanandan sonra qurulub.
Türkiyə Statistika İnstitutunun məlumatına görə, 2010-cu ildə ölkəni 441468 Azərbaycan vətəndaşı ziyarət edib. Onlardan 112055 nəfərinin səfərdə məqsədi doğmalarla və yaxınlaral görüş olub, 100167 nəfər səyahət və istirahət, 44269 nəfər ticarət, 30058 nəfər iş (konfranslar, görüşlər), 12822 nəfər müalicə, 7069 nəfər təhsil almaq, 1556 nəfər dini məqsədlər, 685 nəfər tranzit, 132788 nəfər digər məqsədlərlə səfər edib.
