Azərbaycan, Bakı, 27 aprel /Trend, müxbir E.İsmayılov/
BP və onun tərəfdaşları veb-əsaslı Xəzər Ekoloji İnformasiya Mərkəzini (XEİM) təsis etmək üçün "GRİD-Arendal" təşkilatı ilə ətraf mühit üzrə yeni müqavilə imzalayıblar.
Trend-in "BP-Azərbaycan" şirkətinə istinadən verdiyi məlumata görə, bu layihə Xəzər Ekoloji Proqramı (XEP) çərçivəsində hazırlanıb və onun nəticəsi olaraq Xəzərin ekologiyası üzrə mərkəzləşdirilmiş məlumat mənbəyi kimi istifadə ediləcək onlayn ekoloji məlumat bazasının yaradılması gözlənilir.
Xəzər hövzəsində ətraf mühitin vəziyyəti haqqında ən son məlumatların etibarlı mənbəyi kimi xidmət göstərməkdən əlavə, XEİM ətraf mühitlə bağlı məlumatların toplanmasının yaxşılaşdırılması və ətraf mühitin idarə edilməsi üzrə ən yaxşı təcrübələrin mübadiləsi üçün yaradılır. XEİM həm də regionda davamlı inkişaf və ətraf mühitlə əlaqədar fəaliyyətləri təşviq etmək vasitəsi kimi istifadə ediləcək.
BP-nin normativ uyğunluq və ətraf mühit məsələləri sahəsində Azərbaycan, Gürcüstan və Türkiyə üzrə regional direktoru Faiq Əsgərov deyir: "BP və onun tərəfdaşları bu əməkdaşlığın yaradılmasından məmnundur və inanırlar ki, bu, Xəzər ekologiyası üzrə mütəxəssislərin regionda ekoloji monitorinq və metodikaları standartlaşdırmaq və uzlaşdırmaq səylərini gücləndirəcək. Zənnimizcə, bu mərkəz ətraf mühitlə bağlı regional məlumatlardan daha geniş istifadə imkanları yaradacaq, şəffaflığı artıracaq və ictimaiyyət də daxil olmaqla əsas maraqlı tərəflərlə əlaqələri gücləndirəcək. Ən əsası, inanırıq ki, bu yeni mənbə vasitəsi ilə əhatəli və etibarlı məlumatlardan istifadə etmək imkanı ictimaiyyətin regiondakı ətraf mühitlə bağlı fəaliyyətlərdə iştirakının yaxşılaşdırılmasına kömək edəcək. BP və onun tərəfdaşları XEP çərçivəsində Xəzər regionunu təmsil edən ətraf mühit mütəxəssisləri arasında, o cümlədən hökumət, özəl sektor və qeyri-hökumət təşkilatları arasında aparılan dialoqlara həmişə dəstək verib. Biz veb-əsaslı ekoloji informasiya mərkəzinin yaradılmasını belə dialoqların və əməkdaşlığın gücləndirilməsi üçün daha bir imkan hesab edirik və onun bir hissəsi olmağımızdan məmnunluq duyuruq".
"GRİD-Aredal"ın bacarıqların yaradılması və qiymətləndirilməsi şöbəsinin rəhbəri və XEİM-in layihə meneceri Valentin Yemelin deyir: "Ətraf mühitin mühafizəsi ilə bağlı məsələlərdə BMT-yə dəstək missiyasını yerinə yetirərək, GRID-Arendal ürəkdən istəyir ki, regondakı ölkələrə ətraf mühitlə əlaqədar məlumatların idarə edilməsi və əlaqələrin qurulması sahəsində bacarıqların yaradılmasında kömək etsin. XEİM-in fəaliyyətləri Tehran Konvensiyasına ümumi dəstək daxilində nəzərdə tutulur. Ümid edirik ki, o, diqqəti yalnız problemlər deyil, həm də onların həlli yolları üzərində cəmləməklə Xəzəryanı ölkələr arasında aparılan dialoqa öz müsbət töhfəsini verəcək".
Qeyd edək ki, "GRİD-Arendal" Norveç qeyri-kommersiya təşkilatı və Birləşmiş Millətlər Təşkilatının Ətraf Mühit Proqramının (UNEP) əməkdaşlıq mərkəzidir.
Xəzər Ekoloji Proqramı (XEP) 1997-ci ildə yaradılmış regional təşəbbüsdür. Bu proqram Xəzəryanı ölkələr tərəfindən hazırlanıb və onlar tərəfindən də idarə olunur. Proqram Xəzərin ekologiyasını yaxşılaşdırmaq və regionda davamlı inkişafı təşviq etmək məqsədi daşıyan fəaliyyətləri əhatə edir.
BP və tərəfdaşları XEP təsis olunduğu gündən onunla uğurlu əməkdaşlıq edirlər. Bu əməkdaşlığın bir hissəsi kimi, BP, Azərbaycan Beynəlxalq Əməliyyat Şirkətinin (ABƏŞ) operatoru kimi, XEP Rəhbər Komitəsinin keçirdiyi iclasların fəal iştirakçısı olub. XEP ilə əməkdaşlıq indiyədək aşağıdakı sahələri əhatə edib: XEP-nin Layihənin Əlaqələndirilməsi Bölümünün 1-ci mərhələsini Bakıda qurmaq məqsədi ilə layihəyə dəstək verilməsi; trans-sərhəd xarakterli diaqnostik analizlər, neft dağılmalarına cavab tədbirləri üzrə region və Azərbaycan üçün dövlət planlarının işlənib hazırlanması, Xəzər Konvensiyasının hazırlanması, aqressiv invaziv növlər və biomarkerlər üzrə seminarlar, Xəzər ekologiyası sahəsində mütəxəssislər üçün ətraf mühitin monitorinqi üzrə təlim kursları kimi layihələrə dəstək verilməsi.