...

Sadıq Rəhimovun 100 illik yubiley mərasimi keçiriləcək (FOTO)

Cəmiyyət Materials 11 Sentyabr 2014 16:14 (UTC +04:00)
Sentyabrın 25-də Azərbaycanın tanınmış dövlət xadimi Sadıq Rəhimovun 100 illik yubiley mərasimi keçiriləcək.
Sadıq Rəhimovun 100 illik yubiley mərasimi keçiriləcək (FOTO)

Trend-i buradan izləyin

Azərbaycan, Bakı, 11 sentyabr /Trend/

Sentyabrın 25-də Azərbaycanın tanınmış dövlət xadimi Sadıq Rəhimovun 100 illik yubiley mərasimi keçiriləcək. Bu barədə Trend-ə Təşkilat komitəsindən məlumat verilib.

S.Rəhimovun yubileyi Azərbaycan Prezidentinin 8 iyul tarixli sərəncamına əsasən qeyd olunur. Mərasim Azərbaycan Dövlət Akademik Milli Dram Teatrında təşkil ediləcək.

Yubiley mərasimində S.Rəhimovun həyat və fəaliyyətindən bəhs edən "Şərəfli ömür" kitabının və eyniadlı sənədli filmin təqdimatı da olacaq.

S.Rəhimov 1954-1958-ci illərdə Azərbaycan SSR Nazirlər Sovetinin sədri olub. Bundan başqa o, müxtəlif illərdə toxuculuq sənayesi naziri, Gəncə Şəhər İcraiyyə Komitəsinin sədri, kommunal təsərrüfat və mülki tikinti naziri, çoxişlənən sənaye malları naziri, Sənayedə təhlükəsiz iş aparılması üzərində nəzarət və dağ-mədən nəzarəti Dövlət Komitəsinin sədri, Bakı Baş Tikinti İdarəsinin rəisi və yüngül sənaye naziri vəzifələrində çalışıb.

O, Azərbaycanda tikinti və sənaye sahələrinin inkişafında böyük rol oynayıb. Vəzifədə olduğu illərdə respublikamızın mənafeyinin qorunmasında fəal iştirak edib, Sovet hakimiyyəti rəhbərliyi dəfələrlə onu millətçilikdə ittiham edib.

S.Rəhimovun XX əsrin 50-ci illərində Qarabağı Azərbaycandan istəmək üçün Bakıya gəlmiş erməni keşiş Vazgeni təhqir etməsi o zaman böyük əks-səda doğurmuş və Ermənistan uzun müddət Azərbaycana qarşı ərazi iddiasını dayandırmalı olmuşdu.

S.Rəhimov 1956-cı ildə Azərbaycan SSR Ali Sovetinin 3-cü sessiyasında cəsarətlə çıxış edərək, Azərbaycan dilinin dövlət dili kimi qəbul edilməsi məsələsini dəstəkləmiş və bu sahədə milli kadrların yetişdirilməsinin vacibliyini vurğulamışdı.

O, vəzifədə olduğu müddətdə həmişə, heç nədən çəkinmədən ermənilərin Sovet rəhbərliyindəki havadarlarına qarşı sərt mübarizə aparıb. SSRİ rəhbərliyinin təzyiqlərinə baxmayaraq açıq şəkildə bəyan edib ki, "mən Azərbaycanın şəhər və kəndlərini qazla təmin etmədən Ermənistana qaz xəttinin çəkilməsinə razılıq verə bimərəm!"

O, öz vəzifəsini xalqın mənafeyinə qurban verməklə, Azərbaycan tarixinə vətənpərvər şəxsiyyət və dövlət xadimi olaraq həkk olunub. S.Rəhimov Nazirlər Sovetinin sədri vəzifəsindən məhz Azərbaycanın mənafeyini Sovet dövləti qarşısında cəsarətlə müdafiə etdiyi üçün azad edilib.

S.Rəhimov dəfələrlə Azərbaycan KP MK-nın və onun Bürosunun, Azərbaycan SSR və SSRİ Ali sovetlərinin deputatı, Azərbaycan Ali Soveti Rəyasət Heyətinin üzvü olub.

S.Rəhimov 1975-ci il iyunun 11-də 61 yaşında vəfat edib və Fəxri xiyabanda dəfn olunub.

Məqalədə:
Xəbər lenti

Xəbər lenti