...

Meksikada Azərbaycanla bağlı geniş təqdimat keçirilib (FOTO)

Cəmiyyət Materials 6 Sentyabr 2023 01:46 (UTC +04:00)
Meksikada Azərbaycanla bağlı geniş təqdimat keçirilib (FOTO)

Bakı. Trend:

Meksikanın Xalisko ştatının Tonela şəhərində yerli Ticarət Palatası tərəfindən təşkil olunmuş tədbirdə Azərbaycanla bağlı geniş təqdimat keçirilib. Ölkəmizin Meksikadakı səfiri Məmməd Talıbov tədbirdə iştirak edib.

Səfirlikdən Trend-ə bildirilib ki, 4 saata yaxın davam edən tədbir xüsusilə Azərbaycana həsr olunub, ölkəmizin tarixi, mədəniyyəti, ictimai-siyasi və iqtisadi həyatı barədə geniş təqdimat keçirilib. Tədbirdə federal deputatlar, yerli qanunverici qurumun nümayəndələri və bələdiyyə rəhbərləri, Ticarət Palatasının üzvləri və iş adamları, akademik dairələr, KİV-lərin təmsilçiləri iştirak ediblər.

Tədbirdə çıxış edən M.Talıbov iştirakçıları ölkəmizin zəngin tarixi, mədəniyyəti, qarşılaşdığı çağırışlara baxmayaraq, qısa müddət ərzində keçdiyi uğurlu inkişaf yolu haqqında məlumatlandırıb. Qeyd olunub ki, Ümummilli Lider Heydər Əliyevin Azərbaycan xalqı qarşısında misilsiz xidmətləri, onun təşəbbüsü ilə həyata keçirilən beynəlxalq layihələr və islahatlar nəticəsində Azərbaycan Respublikası beynəlxalq aləmə sürətlə inteqrasiya edən, dinamik iqtisadi inkişafını və siyasi stabilliyini təmin etmiş bir dövlətə çevrilib. Ölkəmizdə 2023-cü ilin “Heydər Əliyev İli” elan olunduğu və Ulu Öndərin 100 illik yubileyinin təntənəli şəkildə qeyd olunduğu bildirilib.

Həmçinin Ermənistanın ölkəmizə qarşı silahlı təcavüzü və işğalın ağır nəticələri, erməni quldurlarının törətdikləri vəhşiliklərdən söz açılıb, Azərbaycana qarşı qərəzli yanaşma və ikili standartların qəbuledilməz olduğu vurğulanıb. Azərbaycanın 44 günlük Vətən müharibəsi nəticəsində 30 illik erməni işğalına son qoyaraq tarixi ədaləti bərpa etdiyi qeyd olunub. Hazırda ölkəmizdə aparılan genişmiqyaslı bərpa-quruculuq işləri, məcburi köçkünlərin qayıdışının təhlükəsiz və ləyaqətli şəkildə həyata keçirilməsi barədə ətraflı məlumat verilib.

Eyni zamanda, tədbir zamanı Azərbaycan-Meksika münasibətlərinin hazırkı vəziyyəti, siyasi və iqtisadi sahələrdə qarşılıqlı faydalı əməkdaşlığın genişləndirilməsi müzakirə edilib. Mədəniyyət, təhsil, ticarət və investisiya sahələrində əməkdaşlıq əlaqələrinin daha da inkişafı üçün geniş imkanların olduğu vurğulanıb.

Sonda çoxsaylı suallar cavablandırılıb, Meksika tərəfindən bu kimi görüşlərin olduqca faydalı olduğu bildirilib.

Xəbər lenti

Xəbər lenti