Bakı. Trend:
Abşeronda görülən meliorativ tədbirlər rayon ərazisində kənd təsərrüfatının inkişafına böyük təkan verir. Ötən il olduğu kimi 2025-ci ildə də əkin sahələrinin suvarılması Azərbaycan Dövlət Su Ehtiyatları Agentliyinin (ADSEA) tabeliyində olan Abşeron Su Meliorasiya Sistemlərinin İstismarı İdarəsi tərəfindən planlaşdırılıb.
Bu barədə Trend-ə Azərbaycan Dövlət Su Ehtiyatları Agentliyindən (ADSEA) məlumat verilib.
Bildirilib ki, su itkisinin qarşısının alınması, o cümlədən suyun maneəsiz axınını təmin etmək üçün Abşeron magistral kanalında lildən və otlardan təmizləmə işləri həyata keçirilir. Bununla da suyun sürətli axını təmin edilir. Bundan başqa Abşeron Magistral kanalının yaşayış məntəqələri ərazisindən keçən hissələrində məişət tullantıları ilə çirkləndirilən hissələr mütəmadi olaraq təmiləniz. İlin əvvəlindən indiyədək kanallar mexanizmlərlə 103000 m3 lildən təmizlənib. Bundan başqa kanallar əl ilə 560 m3, dırmıxla isə 11000 m2 otlardan təmizlənib. İdarə tərəfindən nasos stansiya binaları, hidrotexniki qurğular, mülki və istehsalat binaları, müxtəlif diametrli boru kəmərləri, qol kanalları cari təmir olunub. Bununla yanaşı Abşeron əhalisinin dayanıqlı və keyfiyyətli içməli su ilə təmin etmək üçün müəyyən işlər görülür, su və kanalizasiya xətlərində baş verən qəzalar aradan qaldırılır.
Qeyd edək ki, hazırda Xırdalan şəhəri ərazisində diametri 1000 mm olan dəmir-beton kanalizasiya borusu istismar müddətini bitirdiyi üçün 650 paqono metr hissəsi yenisi ilə əvəz olunur. Cari ildə Kənd Təsərrüfatı Nazirliyinin tabeliyində olan Əkinçilik Elmi Tədqiqat İnstitutunun şəbəkəsinin əsaslı şəkildə yenidən qurulması nəzərdə tutulub. O cümlədən Saray-1 və Qızılnohur nasos stansiyalarının əsaslı təmir işləri aparılacaq. 2025-2026-cı illərdə müxtəlif yerlərdə 1000 hektara yaxın əkin sahələrinin salınacağı nəzərdə tutulur.