"Kabel televiziya yayımçıları qiymətlərin aşağı salınması təklifimizlə razılaşırlar. Lakin onlar bizdən 2-3 ay möhlət istəyirlər". Bu fikirləri Trend ə açıqlamasında Milli Televiziya və Radio Şurasının sədri Nuşirəvan Məhərrəmli bildirib.
Qeyd edək ki, Teleradio Şurasının sədri kabel televiziya şəbəkəsi rəhbərləri ilə görüş keçirib, Azərbaycanda xarici telekanalların yalnız kabel və peyk vasitəsilə yayımı məsələsini onlarla müzakirə edib. N.Məhərrəmlinin sözlərinə görə, kabel yayımçıları abunə haqqının qiymətini aşağı salmağa hazırdırlar. Lakin onlar xarici telekanalların kabel vasitəsilə yayımına, bununla bağlı abunəçilərin sayının artmasına hazırlaşmaq üçün vaxt istəyirlər: "Biz kabel şəbəkəsi qarşısında qiymətlə bağlı şərt qoya bilmərik. Amma biz onlara təklif və tövsiyələrimizi verdik. Kabelə aylıq abunə haqqı orta qiymətlə 8-9-10 manatdır. Biz də tövsiyə etdik ki, ən maksimal qiymət 12-15 manatdan yuxarı olmamalıdır. Kabel şəbəkəsi rəhbərlərinin əksəriyyəti razılaşdılar. Teleradio Şurası onların vaxtın uzadılması barədə təklifini müzakirə edəcək"-deyə N.Məhərrəmli bildirib.
Şura sədrinin sözlərinə görə, xarici telekanalların Azərbaycanda yayımı ya yanvarın 3-dən etirabən, ya da 3 və ya 6 aydan sonra dayandırılacaq: "Biz sərt qərarlar verilməsinin tərəfdarı deyilik. Ancaq eyni zamanda biz heç kəsin qarşısında öhdəlik götürməmişik".
