"Gənclər və İdman Nazirliyinin 2007-ci ildə həyata keçirəcəyi işlərin planı təsdiqlənib". Trend in məlumatına görə, bu sözləri jurnalistlərə açıqlamasında gənclər və idman nazirinin müavini İntiqam Babayev deyib.
Onun sözlərinə görə, ötən il 2007-ci ildə görüləcək əsas vəzifələrin təməli qoyulub.
İ.Babayev vurğulayıb ki, bu il Azərbaycanda keçiriləcək beynəlxalq tədbirlər zəngin olacaq. Belə ki, il ərzində ölkəmizdə Avropa Gənclər Forumunun üzvlərinin konfransı, MDB və Baltikyanı ölkələrin gənc liderlərinin III Forumu keçiriləcək.
"Eyni zamanda, MDB-nin gənclərlə iş üzrə məsul olan nazirlərin toplantısı Bakı şəhərində keçiriləcək. Qaradəniz hövzəsi ölkələri tələbə-gənclərinin forumu və digər beynəlxalq tədbirlər ölkəmizdə baş tutacaq. Bütün bunlar dövlətin gənclərə olan diqqətinin təzahürü və eyni zamanda, ölkənin nüfuzunun güclənməsi ilə bağlıdır. Ümumiyyətlə, qarşıda böyük vəzifələr durur", - deyə nazir müavini qeyd edib.
O bildirib ki, dövlət gənclər siyasətinin ümumi dövlət siyasətində böyük önəmi var. Ona görə də nazirlik çalışır ki, gənclərin bütün maraq qruplarını əhatə edə bilsin: "Ancaq yeni modellərin hamısını tətbiq edə bilmərik. Çünki milli ənənələrimiz qorunmalıdır."