Bakı. Trend:
Braziliya B Seriyasında çıxış edən "Kuritiba"nın rəsmi saytında Səudiyyə Ərəbistanının "Əl-Hilal" klubunun yarımmüdafiəçisi Neymarın transfer edildiyi barədə məlumat yayılıb.
Trend Championat-a istinadən xəbər verir ki, klubun rəsmi saytında 32 yaşlı vingerin transferi ilə bağlı rəsmi mətndə xəbər dərc olunub. Lakin qısa müddət sonra klub saytının hakerlər tərəfindən sındırıldığı məlum olub və məlumatın yalan olduğu təsdiqlənib.
Hazırda Neymar "Əl-Hilal" üçün bütün turnirlərdə iki oyunda iştirak edib, lakin hələlik təsirli çıxış edə bilməyib. Onun klubla müqaviləsi 2025-ci ilin yayına qədər qüvvədədir və daha bir il uzadılma şərti mövcuddur. Transfermarkt portalının məlumatına görə, futbolçunun hazırkı bazar dəyəri 15 milyon avrodur.