Bakı. Trend:
Yanvarın 6-da Azərbaycan Şahmat Federasiyası və Azərbaycan Respublikasının Gənclər və İdman Nazirliyinin təşkilatçılığı ilə şahmat üzrə I dəstə yarışlarına başlanılıb.
Trend xəbər verir ki, bu barədə federasiyanın saytında paylaşım edilib.
Respublika Şahmat Mərkəzində təşkil olunan yarışlar Azərbaycan çempionatına seçmə xarakter daşıyır. Ümumi mükafat fondu 10 min manat olan turnir çərçivəsində kişilər arasında ilk 5 yer, qadınlar arasında isə ilk 2 yer Azərbaycan çempionatına vəsiqə qazanacaq.
Açılış mərasimində çıxış edən Azərbaycan Şahmat Federasiyasının I vitse-prezidenti Faiq Həsənov bu il ilk dəfə olaraq bütün partiyaların internet üzərindən canlı yayımlandığını bildirib. O, həmçinin qeyd edib ki, yarışın sonunda ən yüksək nəticə göstərən şahmatçılar Azərbaycan çempionatında mübarizə aparacaq.
Yarışın qaliblərinə mükafat olaraq kişilər üçün 2500 manat, qadınlar üçün isə 1200 manat təqdim ediləcək.
Qeyd edək ki, turnirə yanvarın 14-də yekun vurulacaq. Turnirin baş hakimi Lütfiyar Rüstəmovdur.