Bakı. Trend:
İqtisadiyyat Nazirliyi tabeliyindəki IV Sənaye İnqilabının Təhlili və Koordinasiya Mərkəzi (4SİM) və "SABAH Hub" arasında Anlaşma Memorandumu imzalanıb.
Trend xəbər verir ki, imzalanma "Baku Investment Day (Baku ID 2024)" çərçivəsində baş tutub.
Memorandumu 4SİM-in icraçı direktoru Fariz Cəfərov və
"SABAH.HUB"ın icraçı direktoru Rəhim Bayramlı imzalayblar.
Anlaşma Memorandumunun məqsədi Azərbaycanda rəqəmsal iqtisadiyyatın
inkişafı çərçivəsində yerli startap ekosisteminin inkişafına dəstək
göstərilməsi və bu sahədə əməkdaşlıqdır.
Memoranduma əsasən, tərəflər ölkədə innovasiya ekosisteminin
inkişafı, süni intellekt fokuslu beynəlxalq və yerli
universitetlərlə ikili diplom proqramlarının təsis olunması,
təcrübəli insan kapitalının ölkəyə cəlb olunması, tədqiqat və təlim
proqramları sahəsində əməkdaşlıq edəcəklər.
Sənəd, həmçinin rəqəmsal iqtisadiyyatın inkişafı çərçivəsində elm
və sənaye klasterinin yaradılması üçün birgə səylərin davam
etdirilməsi, habelə Dünya İqtisadi Forumunun (DİF) “Qlobal
İnnovatorlar” icması ilə oxşar təcrübənin ölkəmizdə tətbiqi ilə
bağlı əməkdaşlığı ehtiva edir.
Qeyd edək ki, Bakıda "SABAH.HUB" İnnovasiya Mərkəzinin dəstəyi ilə "Baku ID" innovasiya festivalı keçirilir. Bu, Azərbaycanda və regionda əsas startap-innovasiya tədbiridir.
Festivalda Azərbaycanın iqtisadiyyat naziri Mikayıl Cabbarov, elm və təhsil naziri Emin Əmrullayev və digər rəsmi şəxslər, o cümlədən 200-dən çox yerli və xarici investor, 100-dən çox startap, 5000 iştirakçı və 50-dən çox tərəfdaş iştirak edir.