Azərbaycan, Bakı/ Trend , müxbir S.Babayeva/ Azərbaycanda cümə günü "quş qripi" təhlükəsi ilə bağlı monitorinq başa çatıb. Monitorinq nəticəsində, milli parkların ərazilərində xəstəlik əlamətlərinin olmadığı müəyyən olunub. Bu barədə cümə günü Azərbaycanın Kənd Təsərrüfatı Nazirliyi yanında Dövlət Baytarlıq Xidmətindən məlumat verilib.
Oktyabrın 22-də başlanılan monitorinq Abşeron və yaxın ərazilərdə, Dəvəçi, Salyan, Ağcabədidə aparılıb və bu gün Lənkəranda başa çatıb.
Dövlət Xidmətinin laboratoriyasına ev quşlarından 864 qan və 34 patoloji nümunə və 15- dən çox vəhşi quşun patoloji nümunələri daxil olub.
Müxtəlif quşçuluq təsərrüfatları və müəssisələrindən ev quşlarının nümunələrinin qəbulu noyabrın 2-nə qədər davam edəcək. Laboratoriya müayinələrinin nəticələri noyabrın 3-də elan olunacaq. Bu il Dövlət Xidməti doqquz monitorinq keçirib, 8 mindən çox vəhşi və ev quşunun nümunələri yoxlanılıb. Bunların heç birində virus daşıyıcısı aşkar olunmayıb.
İndiyə qədər Azərbaycanda çöl quşlarının ovlanması, satışı və ətinin istifadəsinə qadağa qüvvədədir. Ölkənin bütün sərhəd- buraxılış məntəqələrindəki baytarlıq xidmətləri yalnız "quş qripi" deyil, həmçinin, bütün heyvan xəstəliklərinin - "Afrika taunu", "qarayara" və digər xəstəliklərin qarşısının alınması üçün gücləndirilmiş iş rejimində fəaliyyət göstərir.