Azərbaycan, Bakı, 08 fevral / Trend , müxbir İ.Xəlilova / Milli Bank (AMB) "Tikinti əmanət bankları haqqında" qanun layihəsini Azərbaycan hökumətinə müzakirə edilməsi üçün təqdim edib, AMB İdarə Heyətinin sədr müavini Rüfət Aslanlı deyib.
Bu sistemin tətbiq olunan ipoteka mexanizmindən fərqi ondadır ki, bu halda xüsusi əmanət banklarının yaradılması nəzərdə tutulur. Bu banklarda əhali müəyyən dövr ərzində öz əmanətlərini toplaya bilərlər. Bu müddət başa çatdıqdan sonra qalan məbləğə mənzil almaq üçün bankdan kredit cəlb edə bilərlər. Bu daşınmaz əmlak kreditin təmin olunması üçün girov qismində çıxış edəcək.
İpoteka kreditləşməsinin bu modeli Almaniyada İkinci Dünya Müharibəsindən sonra mənzil problemini həll etmək üçün tətbiq edilib. Lakin hazırda Almaniyanın və digər Avropa bankları mənzil maliyyələşməsi üçün təmin edilmiş kredit istiqrazı üzrə modeldən istifadə edirlər.
"Commerz Bank" nümayəndəliyi, İdarə Heyətinin üzvü Martin Blessinqin başçılığı altında AMB-da keçən görüşdə Azərbaycanın ipoteka bazarında iştirak etməkdə maraqlı olduğunu bildirib.
"Lakin əvvəlcə onlar yerli bazarın şərtləri, fəaliyyəti ilə tanış olmalıdır. Müzakirələr zamanı biz qanun layihəsi haqqında məlumat verdik, onlar isə onun qəbul olunmasından sonra əməkdaşlığın gələcək istiqamətlərini müzakirə etməyə hazır olduqlarını bildiriblər, çünki "Commerz Bank" bu model üzrə işləyən nümayəndə banklarına malikdir" - Aslanlı hesab edir.
Azərbaycanda ipoteka kreditləşməsi 2005-ci ilin martından AMB yanında fəaliyyət göstərən Azərbaycan İpoteka Fondunun vəsaitləri hesabına səlahiyyətli bankların vasitəsilə başlayıb. Fəaliyyətə başlayandan Fond dövlət büdcəsi hesabına dəstəklənib, lakin yeni mexanizmə əsasən, kreditləşmə üçün büdcə maliyyələşməsilə yanaşı, kommersiya şərtlərilə xarici vəsaitlər də cəlb edilir.
