Azərbaycan, Bakı, 15 may / Trend / Bakı-Tbilisi-Qars marşrutu üzrə dəmir yolu əlaqəsinin Türkiyə hissəsinin tikintisinə iyun ayında başlanılacaq. Bu barədə Türkiyənin Nəqliyyat Nazirliyinin nümayəndəsi bildirib.
Bu layihə çərçivəsində, Türkiyə ərazisində 76 km uzunluğunda olan dəmir yolunun çatışmayan hissəsi tikiləcək. Türkiyə hissəsinin tikintisinin dəyəri 380 mln. türk lirəsi həcmində qiymətləndirilir.
Layihənin reallaşdırılmasının 2009-cu ildə başa çatdırılması planlaşdırılır. Bu vaxta qədər Mərmərə layihəsi - Bosforun altı ilə tunelin tikintisi başa çatdırılacaq. Bu, Avropaya dəmir yolu əlaqəsinin açılmasına imkan yaradacaq.
Cari ildə Bakı-Tbilisi-Qars dəmir yolu hissəsinin tikinti layihəsinin büdcəsi 107 mln. dollar həcmində müəyyən olunub.
Azərbaycanın "Azərinşaatservis" tikinti şirkəti Gürcüstanda 29 km-lik dəmir yolunun tikinti layihəsi üzrə tenderin qalibi olub və işlərin həyata keçirilməsinə başlayıb. "Azərinşaatservis"lə bağlanan müqavilənin ümumi dəyəri 79 mln. dollar təşkil edir. İşlərin 2009-cu il oktyabrın 1-dək başa çatdırılması nəzərdə tutulub.
Gürcüstanda tikinti və layihə işlərinin maliyyələşdirilməsi Azərbaycanın 200 mln. dollar həcmində kredit vəsaitləri hesabına həyata keçirilir.
"Bakı -Tiflis- Qars" layihəsi çərçivəsində yeni 105 kilometrlik dəmir yolu qolunun tikintisi planlaşdırılır. Bunun 76 km- i Türkiyə ərazisindən, 29 km- i isə, Gürcüstan ərazisindən keçəcək.
Gürcüstanda yükdaşıma gücünü ildə 15 mln. tona çatdırmaq məqsədilə 183 km-lik Axalkalaki-Marabda-Tbilisi dəmir yolu sahəsi yenidən qurulacaq. Axalkalakidə Gürcüstandakı mövcud xətlərdə Avropa standartlarına uyğun qatarların keçid məntəqəsinin tikilməsi planlaşdırılır. Layihə 422 mln. dollar məbləğində ,infrastrukturla birgə 600 mln dollar həcmində dəyərləndirilr.