Azərbaycan, Bakı, 30 may/ Trend , müxbir İ.Xəlilova/ Azərbaycanın Milli Bankı (AMB) islam bankının fəaliyyətinə nəzarət təcrübəsinin tətbiqi üzrə strategiya işləməyi planlaşdırır. Bu barədə cümə günü AMB-nin kredit təşkilatlarının fəaliyyətinə nəzarət üzrə Departamentinin direktoru Rəşad Orucov məlumat verib.
"İslam bankinqinin tətbiqinədək müvafiq qanunverici baza və islam bankının fəaliyyətinə nəzarət üzrə tənzimləyici rejim hazırlanmalıdır", - Orucov qeyd edib.
Strategiyada infrastruktur və institusional çərçivələr öz əksini tapmalıdır. AMB nümayəndəsinin sözlərinə görə, hazırda Milli Bankda şəriət prinsipləri üzrə iş təcrübəsinin öyrənilməsinə dair fəal iş aparılır.
"İslam fəaliyyəti bütün dünyada çox sürətlə inkişaf etməyə başlayıb və tənzimləyici orqanlar fəal surətdə bunun üzərində düşünməyə başlayıblar, - Orucov bildirib. Hətta Bazel Komitəsi islam bank fəaliyyətinə nəzarət prinsiplərinin hazırlanmasına başlayıb və bu prinsiplər Azərbaycanda da əsas kimi götürülə bilər".
İİB-in regional nümayəndəliyinin direktoru Nik Zeynal Abidin cümə günü bildirib ki, İslam İnkişaf Bankı (İİB) Azərbaycanda şəriət prinsipləri üzrə işləyən bankın yaradılmasına, xüsusilə də təlimatların hazırlanmasında texniki yardım göstərilməsinə hazırdır. Hazırki mərhələdə İslam İnvestisiya Şirkəti yaradılır. Bu şirkətin yaradılmasında Özəl Sektorun İnkişafı İslam Korporasiyası (İİB qrupuna daxildir), Azərbaycan İnvestisiya Şirkəti və Yaxın Şərq şirkətləri iştirak edirlər.
Regional direktor hesab edir ki, bu birgə şirkət islam prinsipləri üzrə fəaliyyət göstərəcək. İİB Azərbaycanda islam bankının təsisində də iştirak etməyə hazırdır. Lakin bunun üçün əvvəlcə İqtisadi İnkişaf və Maliyyə Nazirliklərinə belə təşəbbüslə müraciət etməlidir.
"İslam bankını bu dövlət orqanları ilə birgə işləməklə təsis etmək mümkün olacaq və artıq İİB Azərbaycanda islam bankının yaradılmasında Milli Banka yardım etməyə hazır olduğunu bildirib", - Abidin söyləyib.
Ölkədə şəriət qaydaları üzrə fəaliyyət göstərmək arzusunda olduğunu bildirmiş ilk institut artıq fəaliyyət göstərir. Kauthar Bank - Azərbaycanda "islam bankinqi" prinsipi üzrə işləyən yeganə bankdır. Lakin, o, hələ şəriət qanunları üzrə tam fəaliyyətə başlamayıb. Orucovun sözlərinə görə, mövcud bank qanunvericiliyi bu prinsiplər üzrə fəaliyyət göstərməyə imkan vermir və bununla əlaqədar, Kauthar Bank-ın əsas fəaliyyəti qiymətli kağızlarla əməliyyatlarla bağlıdır.
Mayın 30-a olan rəsmi məzənnə - 0,8248 AZN/USD.
Müəlliflə əlaqə saxlamaq üçün elektron ünvan: [email protected]