Azərbaycan, Bakı, 06 avqust/ Trend Cap , müxbir İ.Xəlilova/ Sahibkarlığa Kömək Milli Fondu (SKMF) ilin əvvəlindən dövlət büdcəsindən ayrılan 53,8 mln. manat məbləğində vəsaitin mənimsənilməsini başa çatdırıb. Bu barədə çərşənbə günü İqtisadi İnkişaf Nazirliyindən məlumat veriblər. Milli Fondan ayrılan vəsaitləri 51 şəhər və rayonda 483 sahibkarlıq subyekti alıb.
SKMF-in güzəştli kreditlərin verilməsi müvəkkil kredit təşkilatı kimi seçilmiş 29 kommersiya bankı, 1 bank olmayan kredit təşkilatı və 4 kredit ittifaqı vasitəsilə həyata keçirilir.
Maliyyələşdirilmiş layihələrin 78%-i respublikanın regionlarının payına düşür. Bu layihələrin 85%-dən çoxu istehsal və emal yönlüdür.
Ayrılmış kreditlər, əsasən, sənaye məhsulları istehsalı (94 layihə), kənd təsərrüfatı məhsullarının istehsalı və emalı, kəndli fermer təsərrüfatlarının inkişafı (348 layihə), turizm infrastrukturunun inkişafı (24 layihə), xidmət sahələri (16 layihə). üzrə layihələrin maliyyələşdirilməsinə yönəldiləcəkdir. Bu il maliyyələşdirilən layihələr hesabına 5,9 minədək yeni iş yerinin yaradılacağı gözlənilir.
Mikrokreditlər və kiçik kreditlərin verilmə müddəti iki ilədək, orta kreditlərin müddəti - üç ilədək, böyük - beş il, iri - yeddi il müəyyən edilib. SKMF Müşahdiə Şurasının qərarına əsasən, kreditin verilmə müddəti ilə bağlı istisnalar ola bilər. Bir sahibkara düşən kreditin maksimal məbləği 3 mln. manat təşkil edir. Kredit üzrə dərəcə 7 faizi ötməməlidir.
2008 - ci ilin dövlət büdcəsində SKMF üçün 80 mln. manat ayrılıb. Bu vəsaitin 6 mln. manatı NMR-dan olan sahibkarların maliyyələşdirilməsi üçün nəzərdə tutulub. Milli Fond bu il sahibkarlara 100 mln. manatdan çox kredit vəsaitinin ayrılacağını gözləyir.
Cari mübadilə məzənnəsi -- 0,8093 AZN/USD.
Müəlliflə əlaqə saxlamaq üçün elektron ünvan - [email protected]