Azərbaycan, Bakı, 02 oktyabr / Trend , müxbir Ü.İsmayılova / "Azərbaycanın Əhalinin Dövlət Sosilal Müdafiə Fondunda (ƏDSMF) məlumat həddən artıq çoxdur və bununla əlaqədar fond sosial təminat sistemində informasiya-kommunikasiya texnologiyalarının (İKT) rolu haqqında digər ölkələrin təcrübəsini öyrənmək niyyətindədir", - Sosial Müdafiə Fondunun rəhbəri Səlim Müslimov cümə axşamı sosial təminat sahəsində İKT idarəetməsi üzrə texniki seminarda bildirib.
"Sosial təminatda İKT-nin tətbiqi digər sahələrlə müqayisədə xüsusilə vacibdir", - o bildirib.
Bu gün ölkədə 1,263 mln. pensiyaçı və təxminən 1,5 mln. sosial sığortalanmış şəxs qeydiyyata alınıb. ƏDSMF-in onların hər biri haqqında geniş məlumatı var. Sosial Müdafiə Fonunda qeydiyyatdan keçən şəxslərin hər biri haqqında məlumat bazasına yalnız onların şəxsiyyəti haqqında deyil, pensiyasının həcmi, pensiyaya çıxma şərtləri, pensiyaların verilməsində dəyişikliklər və bunun səbəbləri, pensiyaçı statusu haqda və digər məlumatlar daxildir.
"Belə böyük həcmdə məlumatın olması ilə əlaqədar müasir İKT idarəetmə sistemi bu məlumatların emalı və arxivləşdirilməsi üçün vacibdir", - Müslimov hesab edir.
Onun sözlərinə görə, sosial təminatda İKT-nin tətbiqi bu sistemdə ədalətin təmin edilməsi üçün də vacibdir: hər pensiyaçı bütün əmək fəaliyyəti dövrü ərzində yatırdığı qədər müavinət almalıdır.
"Fond sistemin inkişafı üçün maliyyə-texniki şərait yaratsa da, sosial təminatda İKT-nin keyfiyyətli tətbiqi üçün digər ölkələrin təcrübəsini öyrənəcəyik", - Müslimov vurğulayıb.
Bakıda ƏDSMF və Beynəlxalq Sosial Təminat Assosiasiyasının (BSTA) təşkilatçılığı ilə sosial təminat sahəsində informasiya-kommunikasiya texnologiyaları ilə idarəetmə üzrə texniki seminar keçirilir. Seminarda BSTA-ya üzv 17 ölkənin, o cümlədən ABŞ, Hollandiya, İran, Polşa, Fransa, Belçika, İtaliya və digər dövlətlərin nümayəndələri iştirak edirlər.
Seminar Avropanın sosial təminat təşkilatlarının layihələrində İKT idarəetməsi mövzusuna, həmçinin keçid iqtisadiyyatlı ölkələrin təcrübəsi ilə tanışlığa həsr olunub.
Sosial təminat sisteminin idarə edilməsində İKT-nin rolunun öyrənilməsi Beynəlxalq Sosial Təminat Assosiasiyası Ali Liqasının 2008-2010-cu illər üçün strateji planına daxildir.
Təşkilatın strategiyası ölkə əhalisinin sosial təminatı sahəsində strukturların koordinasiyasının sadələşdirilməsi üçün müasir texnologiyaların tətbiqinə keçidi nəzərdə tutur.
BSAT əhalinin sosial müdafiəsi sahəsində vahid dünya siyasətinin həyata keçirilməsini qarşısına məqsəd qoyan universal beynəlxalq təşkilatdır.
Müəlliflə əlaqə saxlamaq üçün elektron ünvan: [email protected]
