...

Azərbaycanın prosesinq mərkəzi iki bank vasitəsilə e-commerce xidməti təqdim edəcək

Biznes və iqtisadiyyat xəbərləri Materials 10 Oktyabr 2008 13:39 (UTC +04:00)

Azərbaycan, Bakı, 10 oktyabr / Trend Cap , müxbir İ.Xəlilova/ Millicart Məhdud Məsuliyyətli Cəmiyyəti (MMC) oktyabrın sonu-noyabrın əvvəlinə İnternet vasitəsilə mal və xidmətlər üzrə ödənişlərin edilməsi üçün e-commerce xidmətini işə salmağı planlaşdırır, - cümə günü mərkəzin direktoru Cəlal Orucov deyib.

Başlanğıc mərhələdə bu xidmətlər UniBank və Azerdemiryolbank vasitəsilə göstəriləcək, belə ki, bu günədək yalnız onlar Visa və MasterCard beynəlxalq ödəmə sistemlərində sertifikatlaşdırmadan keçiblər. UniBank-ın müştəriləri elektron kommersiya üçün Visa, Azerdemiryolbank-ın müştəriləri isə Mastercard ödəmə sistemindən istifadə edə biləcəklər.

"Gələcəkdə e-commerce xidmətləri göstərən bankların siyahısı genişlənə bilər, lakin sertifikatlaşdırma üçün ödəmə sistemlərinin tələblərinə cavab vermək lazımdır. Daha dəqiq desək, onların kartları ilə işləmək üzrə ən azı 2-3 il təcrübə lazımdır", - Orucov bildirib.

Hazırda Millicart vasitəsilə göstərilən xidmətlərin 50 faizi bu iki bankın payına düşür. Mərkəzdə xidmət göstərilən 11 bank vasitəsilə orta hesabla 90 min kart buraxılıb.

Elektron kommersiya sisteminin tətbiq edilməsi üçün Azərbaycanın Golden Pay şirkəti Millicart-a yardım edir.

İnternet-mağazalarda kartlar üzrə ödəniş bu iki beynəlxalq ödəmə sisteminin yaratdığı e-commerce sistemi vasitəsilə dünyanın bütün ölkələrində edilə bilər.

MMC 2006-cı il iyulun 14-də təsis edilib. Mərkəzin təsisçiləri bunlardır: Atabank, Azərdəmiryolbank, Azertürkbank, Bank of Baku, Azərbaycan Sənaye Bankı, Debütbank, Əmrahbank, Xalqbank, Kredobank, Azərbaycan Mikromaliyyələşdirmə Bankı, ParaBank, Rabitəbank, Bank Respublika, Bank Standard, Texnikabank, Turanbank, UniBank və Zaminbank.

Xəbər lenti

Xəbər lenti