Azərbaycan, Bakı, 20 noyabr/ Trend / Moody's Investors Service Azərbaycan bankı - "Bank Respublika"nın xarici və yerli valyutada depozit üzrə uzunmüddətli reytinqini B2- müsbətdən B2-stabilə dəyişib. Bu barədə reytinq agentliyinin məlumatında bildirilir.
Moody's bankın maliyyə stabilliyi reytinqini E+stabil səviyyəsində təsdiq edib.
"Moody's-in bankın reytinqini müsbətdən stabilə dəyişməsi qərarı "Bank Respublika"nın kredit riskləri və təkrar maliyyələşdirmə risklərinə meylliliyin artmasını nümayiş etdirir", - deyə Moody's-ın Moskva Ofisinin aparıcı analitiki və "Bank Respublika" üzrə agentlikdə analitik Lev Dorf bildirib.
Moody's qeyd edir ki, son illər "Bank Respublika" aktivlərinin sürətli artımı əsasən beynəlxalq borcların hesabına baş verib. Beynəlxalq borclar 2006-cı ildə qeydə alınan 28 mln. dollardan 2008-ci ildə qeydə alınan təqribən 161 mln. dollaradək artıb ki, bu da bankın ümumi borc həcminin yarısını üstələyir.
"Moody's-ın fikrincə, maliyyələşmə bazarından yüksək asılılıq bankın likvidlik mövqeyini potensial olaraq zəif edir və onu xüsusilə də xarici borclanmaya məhdud giriş ilə beynəlxalq bazarlarda sərt likvidlik şərtləri şəraitində yüksək təkrarmaliyyələşdirmə risklərinə məruz qoyur", - deyə Dorf bildrib.
