Azərbaycan Milli Bankının uçot dərəcəsini azaltması lazımi səmərə vermir - ekspert
Azərbaycan, Bakı, 02 dekabr/ Trend , müxbir Ü.İsmayılova/ "Azərbaycan Milli Bankının (AMB) dekabrın 1- dən uçot dərəcəsini səkkiz faizədək azaltması nəzəri baxımdan antiböhran tədbirləri çərçivəsində düzgün addım olsa da, Mərkəzi Bankın belə siyasəti Azərbaycanda lazımi səmərə vermir", - "İqtisadi Tədqiqatlar Mərkəzi" QHT-nin rəhbəri Qubad İbadoğlu çərşənbə axşamı bildirib.
"Bankın belə siyasətindənsəmərə ona görə mövcud deyil ki, ölkənin Milli və kommersiya bankları arasında birbaşa əlaqə yoxdur", - İbadoğlu deyib.
Onun sözlərinə görə, 2008 - ci ildə AMB artıq üçüncü dəfə uçot dərəcəsini 15 faizdən səkkiz faizədək azaltsa da, kommersiya bankları yaranmış böyük risk və likvidliklə bağlı problemlərə görə, kreditlər üzrə faiz dərəcələrinin azaldılmasına getmirlər.
Digər tərəfdən, Milli Bankın qərarı pul kütləsinin artması ilə əlaqədar ölkədə inflyasiya səviyyəsinin yüksəlməsinə gətirə bilər; kreditlər üzrə faiz dərəcələri azaldılarkən, sərmayə imkanları artır.
İbadoğlunun rəyinə görə, AMB belə addımları digər imkanlar olmadığı üçün atır. Məsələn, qiymətli kağızlarla əməliyyatların canlanması problemin həlli ola bilər. Lakin ölkədə fond bazarı inkişaf etmədiyi üçün bu mümkün deyil.
"Uçot dərəcəsinin azaldılmasından müsbət təsirinin ola biləcəyi yeganə sahə hazırda Azərbaycanda vəsait çatışmazlığı ilə əlaqədar dayandırılan ipoteka kreditləşdirməsinin faiz dərəcələridir", - İbadoğlu bildirib.
Müəlliflə əlaqə saxlamaq üçün elektron ünvan: [email protected]
