Azərbaycan, Bakı, 17 fevral / Trend , müxbir Ü. İsmayılova/ Azərbaycan Realtorlar İttifaqı Milli Bankın nəzdində yerləşən ipoteka fonduna kredit verilməsini bərpa etmək üçün təklif irəli sürüb. Bu barədə çərşənbə axşamı ittifaqın prezidenti Vəfadar Axundov məlumat verib.
"Azərbaycanda ipoteka kreditlərinin bərpası ölkənin bir neçə iqtisadi sahələrini qlobal maliyyə böhranının təsirindən qoruyacaq," - Axundov bildirib.
Axundovun sözlərinə əsasən, ipoteka kreditlərinin verilməsini bərpa etmək üçün 170 milyon manat tələb olunur. İpoteka bank, siğorta, qiymətləndirmə, daşınmaz əmlak bazarı və bu kimi digər iqtisadi sahələrin aktivləşməsinə xidmət edəcək.
Axundovun fikrinə görə, qlobal maliyyə böhranının təsirini azaltmaq üçün ipoteka kreditlərinin verilməsi vacibdir.
Azərbaycan İpoteka Fondu (AİF) vəsait çatışmazlığı səbəbindən 2007-ci ildə ipoteka kreditlərinin verilməsini dayandırıb.
"Fond bu prosesi bir il ərzində bərpa etməyi nəzərdə tutub", - bu barədə fondun icraçı direktor müavini Mustafa Məmmədov məlumat verib.
"İpoteka fondu artıq aidiyyəti orqanlara və Nazirlər Kabinetinə təklif layihələrini təqdim edib," - Məmmədov bildirib.
Məmmədovun sözlərinə görə, ipoteka kreditinin bərpası ölkənin anti-böhran tədbirlərindən biridir.
MBA Group, New Europe və Baki Emlak şirkətləri Azərbaycan Realtorlar İttifaqıının əsasını qoyublar. İttifaq 2008-ci ilin oktyabr ayında Azərbaycan Ədliyyə Nazirliyində qeydiyyatdan keçib.
Məqalə müəllifi ilə əlaqə ünvanı: [email protected]
