Azərbaycan, Bakı, 20 fevral / Trend , müxbir Ü.İsmayılova/ "Azərbaycan hökuməti cari ildə layihələrin sərmayələşdirilməsi və dünya maliyyə böhranının təsirinin azaldılması üçün dövlət büdcəsinin vəsaitlərini qənaətlə xərcləmək niyyətindədir", - cümə günü iqtisadi siyasət üzrə daimi parlament komissiyasının sədri Ziyad Səmədzadə deyib. Azərbaycanın dövlət büdcəsinə yenidən baxılması 2009-cu ilin may ayına nəzərdə tutulub.
"Dövlət büdcəsinə yenidən baxılma zamanı dünya maliyyə böhranının durumu nəzərə alınacaq və böyük dövlət sərmayə proqramlarının vəsaitləri qənaətlə sərf olunacaq", - Səməzadə bildirib.
Onun sözlərinə görə, hökümətin bütün investisiya proqramları həyata keçiriləcək və onların dayandırılması baş verməyəcək.
2009-cu il dövlət büdcəsinin xərcləri 12,35 milyard manat həcmində proqnozlaşdırılır. Əsas fondlara kapital qoyuluşlarına xərclər 5,60 milyard həcmində nəzərdə tutulub. Dövlət büdcəsində sosialyönlü xərclər 33 faiz həcmində nəzərdə tutulub. Elm, təhsil, səhiyyə, mədəniyyət, bədən tərbiyəsi və gənclər siyasəti üçün nəzərdə tutulan tədbirlərə xərclər 2,13 milyard manat həcmində nəzərdə tutulub.
Məqalə müəllifi ilə əlaqə ünvanı: [email protected]
