Türkmənistan, Aşqabad, 19 may / Trend , müx. Q.Həsənov /
Türkmənistan Prezidenti Qurbanqulu Berdıməhəmmədov "EWC" və "Hoshtief" Almaniya şirkətlərinə Aşqabadda aerovoğzal kompleksinin tikinti layihəsinin hazırlanmasının tezləşdirilməsi barədə göstəriş verib, yerli telekanal Altın Asırın verdiyi məlumatda bildirilir.
İşlər "Türkmənhovaelları" dövlət xidmətinin mütəxəssisləri ilə birgə həyata keçirilməlidir. Məsələ Aşqabada gələn"EWC" şirkətinin direktoru Rudi Lamprextlə keçirilən görüşdə müzakirə edilib.
Bir sıra istiqamətlərdə ixtisaslaşmış konsaltinq şirkətinin rəhbəri qeyd edib ki, Türkmənistanla əməkdaşlıq kompleks xarakter daşıyacaq və təmamilə dövlət prioritetlərini nəzərə almaqla qarşılıqlı faydalı əsasda qurulacaq.
Əvvəllər ölkə ilə əməkdaşlıq edərək onlarla layihəni həyata keçirən "Siemens AG" məşhur alman şirkətinə rəhbərlik etmiş qonağı salamlayan Berdıməhəmmədov qeyd edib ki, "Türkmənistan həmişə köhnə tərəfdaşları ilə əməkdaşlığa və qarşılıqlı faydaya əsaslanan tərəfdaşlığa hazırdır".
Altın Asır telekanalının məlumatına əsasən, tərəflər əməkdaşlıq perspektivlərini, geniş imkanlar yaradan Türkmənistanın böyük iqtisadi və ehtiyatlar potensialını, o cümlədən AFR-dən olan tərəfdaşların malik olduğu təcrübə və müasir texnologiyanı qiymətləndiriblər.
Məqalə müəllifi ilə əlaqə ünvanı: [email protected]
