Azərbaycan, Bakı, 24 iyun / Trend , müxbir N.İsmayılova /
"Azərbaycan Mərkəzi Bankı (AMB) Dünya Bankı (DB) ilə birlikdə maliyyə xidməti istehlakçılarının hüquqlarının müdafiəsi və maliyyə sahəsində biliklərin artırılması üzrə hesabat hazırlayıb", - çərşənbə günü AMB-nin Beynəlxalq Münasibətlər Departamentinin başçısı Fərid Baxşıyev deyib.
"Bu, Azərbaycanda bu qəbildən ilk hesabatdır və o, həm qanunverici-hüquqi struktur, həm maliyyə nəzarəti, həm də mikromaliyyə sektorunu əhatə edir", - Baxşıyev bildirib.
Onun sözlərinə görə, bu, hesabatın ilkin variantıdır və gələcəkdə ona əlavə və dəyişikliklərin edilməsi gözlənilir. Layihənin regional koordinatoru Süzan Rutletcdir.
Avropa və Asiyada artıq doqquz belə hesabat hazırlanıb.
AMB idarə heyəti sədrinin birinci müavini Alim Quliyevin sözlərinə görə, maliyyə xidmətləri istehlakçılarının hüquqlarının müdafiəsi bu gün çox aktualdır.
"Hələ bir müddət əvvəl AMB bu məsələnin irəlilədilməsi məqsədilə müxtəlif maliyyə institutları ilə danışıqlar aparıb. Bununla əlaqədar olaraq DB ekspertləri əhalinin maliyyə məsələləri ilə bağlı biliklərinin artırılması məqsədilə bank, sığorta sektoru və kapital bazarını əhatə edən ümumi bazarın diaqnostika, qiymətləndirilməsi və analizini aparıb", - Quliyev bildirib.
Onun sözlərinə görə, MB-nin əsas məqsədi maliyyə xidmətləri istehlakçılarının hüquqlarının müdafiəsinin səmərəli sisteminin yaradılması və xüsusi idarəedici orqanın yaradılmasıdır.
"Böhran şəraitində bu məsələ xüsusilə aktualdır. Səbəb isə bank sektoruna inamın artırılması və bank xidmətlərinin təkmilləşdirilməsidir", - Baxşıyev bildirib.
Məqalə müəllifi ilə əlaqə ünvanı: [email protected]
