Azərbaycan, Bakı, 01 iyul / Trend , müxbir Ü.İsmayılova /
Azərbaycanın Əmək və Əhalinin Sosial Müdafiəsi Nazirliyi "Aztəminatlı ailələrin sosial reabilitasiyası" proqramı çərçivəsində 13 layihə hazırlayır. Bu barədə Bakının Nizami rayonu əhalisinin Sosial Müdafiə Fondunun direktoru Əli Əliyev layihənin işçi qrupunun iclası çərçivəsində bildirib.
"Layihədə əsas məqsəd nöqsanları aradan qaldırmaq, digər ailələr tərəfindən aztəminatlı ailələrə dəstək göstərmək, ehtiyacı olan ailələrin vəziyyətini yaxşılaşdırmaqdır", - Əliyev qeyd edib.
Onun sözlərinə əsasən, planlaşdırılan tədbirlər çərçivəsində vacib məsələ ölkədə sosial yardımın müvəqqəti xarekter daşıması və yardım alan şəxslərin işlə təmin olunmasıdır.
"Əhali sosial yardımın alınmasına vərdiş etməməlidir. Onlar müvəqqəti xarakter daşıyan ünvanlı sosial yardımın (ÜSY) alınması ilə yanaşı, işlə təmin olunmalı və ya lazım gəldikdə ixtisaslarını dəyişməli olduqlarını başa düşməlidirlər", - Əliyev bildirib.
Əliyev qeyd edib ki, layihə çərçivəsində ÜSY-nin ödənilməsinin yeni mexanizmləri hazırlanır. Hazırda bütün ailələr üçün yardım məbləği eynidirsə, gələcəkdə yardımın ailənin hər bir üzvü nəzərə alınaraq ödənilməsi planlaşdırılıb.
Əliyevin sözlərinə görə, ÜSY-nin ödənilməsi üzrə yeni qaydalar içərisində bir yaş yarımadək uşaqlara verilən yardımın müddətinin səkkiz və on altı yaşadək uzadılması da yer alır.
"Bütün bu köməkçi layihələr işçi qrupunun müzakirə mərhələsindədir, gələcəkdə bütün mexanizmlər təkliflər və qanun layihələri çərçivəsində təqdim ediləcək", - deyə Əliyev bildirib.
Azərbaycanda ÜSY 2006-cı ilin iyul ayının 1-dən tətbiq edilib. Ölkədə iyulun 1-nə ÜSY alanların sayı 817,35 min təşkil edir. Ölkədə bir ailə üçün ÜSY-nin orta aylıq məbləği 98,19 manat, bir nəfərə isə 21,56 manat təşkil edir. ÜSY alanların 77,8 faizi ilk dəfə yardım alır.
Bakının Nizami rayonunda 4255 nəfər ÜSY alır.
Məqalə müəllifi ilə əlaqə ünvanı: [email protected]