Azərbaycan, Bakı, 06 avqust / Trend , müxbir E. İsmayılov /
Bakı metropolitenində qatarlar arasında hərəkət intervalı yay rejimi çərçivəsində qış rejimindəki 2 - 2,2 dəqiqəlik intervala müqayisədə 3 dəqiqədir. Bunu cümə axşamı metropolitendəki mənbə deyib.
Yay mövsümündə metrodan istifadə edən sərnişinlərin sayı nəzərəçarpacaq dərəcədə azalır. Qatarların hərəkəti intervalının artırılması da bununla əlaqədardır.
"Hazırda metropoliten yay rejimində işləyir. Qatarlar üç dəqiqəlik intervalla hərəkət edirlər", - mənbə deyib.
Mənbənin dediyinə görə, hazırda saatda hər iki istiqamətə (mərkəzdən və mərkəzə) Bakı metrosu 20 qatarla hərəkət edir. Qış mövsümündə metroda hərəkət edən qatarların sayı saatda 30 olur.
Bu ilin birinci yarısında Bakı metropolitenində 109,7 milyon sərnişin daşınıb ki, bu da ötən ilin müvafiq dövründəki göstəricidən 8,8 faiz çoxdur.
Bakı metropoliteni 1967-ci ildən etibarən fəaliyyət göstərir ("İçəri Şəhə" stansiyasından "Nəriman Nərimanov" stansiyasına kimi üç aralıq stansiyası ilə). Metropolitenin yeddi stansiyası ("İçəri Şəhər", "Sahil", "28 May", "Cəfər Cabbarlı", "Xətai", "Nizami", "Elmlər Akademiyası") dərində yerləşir, "Bakmil" yerüstü, qalanları isə sütunludur, dayazda yerləşir (cəmi 21 stansiya).
Məqalə müəllifi ilə əlaqə ünvanı: [email protected]
