Azərbaycan, Bakı, 19 avqust / Trend , müxbir Ü.İsmayılova /
Azərbaycanın sığorta bazarının ixtisarı ən zəif şirkətlərin müflisliyinə və ləğvinə gətirib çıxara bilər. Bu barədə çərşənbə günü "Azergarant Sigorta" şirkətinin İdarə Heyətinin sədr müavini Şükür Hüseynov deyib.
"Belə vəziyyətə biznesini əsasən bank əməliyyatları və zəif maliyyə ehtiyatları (nizamnamə kapitalı, müştərək kapital, yığım həcmi) hesabına inkişaf etdirən şirkətlər düşə bilərlər", - Hüseynov deyib.
Onun sözlərinə görə, belə vəziyyət təbiidir. Şirkətin portfelinin böyük hissəsi bank əməliyyatları hesabına formalaşdırlırsa (hazırda banklar riskli kreditləri dayandırıblar), həmçinin sığortaçılarda əlavə pul yoxdursa, o zaman onlar ödəmələri uzunmüddətli müqavilələrlə ödəməli olurlar.
Yaranmış vəziyyətə baxmayaraq, Hüseynovun sözlərinə görə, bazarın artımı davam edir. Azərbaycanda cəmi 5-6 şirkət öz biznesini bank əməliyyatları hesabına inkişaf etdirir.
İlin sonunadək proqnozlardan danışarkən Hüseynov deyib ki, əhəmiyyətli dərəcədə olmasa da, artım gözlənilir.
Azərbaycanda 28 sığorta və bir təkrarsığorta şirkəti fəaliyyət göstərir. 2008-ci ildəki fəaliyyətin yekununa görə, şirkətlər 49,81 milyon manatlıq ödəmələrlə 179,26 milyon manat məbləğində sığorta pulu toplayıblar. İlin birinci yarısının yekunlarına görə, yığım 24,65 milyon manatlıq ödəmələrlə 79,89 milyon manat səviyyəsində olub. Şirkətlərin yığımı altı ay ərzində 17 faiz azalıb.
"Azergarant" ASC sığorta bazarında 1993-cü ildən fəaliyyət göstərir. Şirkət 26 növ sığorta xidməti göstərir ki, onların 4-ü məcburidir. Şirkətin nizamnamə kapitalı 1,8 milyon, balans gəliri 237,1 min manatdır.
Avqustun 19-na olan rəsmi məzənnə 0,804 AZN/USD təşkil edir.
Məqalə müəllifi ilə əlaqə ünvanı: [email protected]