Azərbaycan, Bakı, 08 oktyabr / Trend , müxbir E.İsmayılov/
Bakı beynəlxalq dəniz ticarət limanından cümə axşamı verilən məlumata görə, liman bu ilin sonunadək İrandan gətirilən 200 min tona qədər sement klinkerini qəbul edəcək. Qeyd edək ki, klinker sement istehsalı üçün əsas komponent sayılır.
Mənbədən deyiblər ki, artıq ilin əvvəlindən limana 170 min tona yaxın sement klinkeri gətirilib. İlin sonunadək isə bu rəqəm 200 minə çatdırılacaq.
Mənbədən verilən məlumata görə, alınan klinkerlər limanın quru mal daşınan terminalında qarışdırılır.
İran klinkerlərinin boşaldılması bu ilin fevral ayında başlayıb. Yük sifariş edənin məlumatına görə, idxal olunan İran klinkerinin müqavilə üzrə həcmi bir milyon ton təşkil edir. Birinci il üçün bu həcm 200 min ton planlaşdırılıb.
Azərbaycan Dövlət Statistika Komitəsindən verilən məlumata əsasən, yanvar-iyul aylarında ölkəyə 1.1 milyon ton sement və sement klinkeri idxal olunub ki, bu da keçən ilin analoji dövrünün göstəriciləri ilə müqayisədə 17.8 faiz azdır. Bu il 39 milyon dollar məbləğində sement və sement klinkeri idxal olunub ki, bu da keçən ilin analoji dövrünün göstəriciləri ilə müqayisədə 18.2 faiz azdır.
Yanvar-iyul aylarında ölkəyə 414.8 min ton sement və sement klinkeri idxal olunub ki, bu da keçən illə müqayisədə 28.3 faiz azdır. 13.1 milyon dollar məbləğində klinker idxal olunub ki, bu da keçən ilin göstəriciləri ilə müqayisədə 25.6 faiz azdır.
Yanvar-iyul aylarında ölkəyə 677 min ton sement idxal olunub ki, bu da 2008-ci illin yanvar-iyul ayları ilə müqayisədə 9.7 faiz azdır. Qeyd olunan dövrdə ölkəyə 26 milyon dollar məbləğində sement idxal olunub ki, bu da keçən ilin göstəriciləri ilə müqayisədə 13.8 faiz azdır.
Məqalə müəllifi ilə əlaqə ünvanı: [email protected]
