Azərbaycan, Bakı, 10 oktyabr / Trend , müxbir Ü.İsmayılova /
Azərbaycan-Türkiyə İş Adamları Birliyi (ATIB) və Asiya və Sakit Okean Zonası üzrə Maliyyə İnstitutlarının İnkişafı Assosiasiyası (ADFIAP) əməkdaşlıq haqqında protokol imzalayıb, bu barədə şənbə günü ATIB-dən bildirilib.
Tərəflər iqtisadi, sosial və mədəni münasibətlərin möhkəmlənməsi sahəsində əməkdaşlıq üzrə razılıq əldə ediblər.
Protokola əsasən, tərəflər kiçik, orta və böyük biznesin inkişafına kömək edəcək, həmçinin birgə konfrans və simpoziumlar təşkil edəcəklər. Tərəflər həmçinin hər iki təşkilatın üzvləri arasında tərəfdaş münasibətlərinin yaradılması və təcrübə mübadiləsinə dair razılığa gəliblər.
Protokolu ATIB-ın idarə heyətinin sədri Əhməd Erentok və ADFIAP-ın baş katibi Oktavia Borlaza Peralta imzalayıb.
ADFIAP Asiya və Sakit Okean regionunun inkişafının maliyyələşdirməsində iştirak edən bütün inkişaf banklarının və digər maliyyə müəssisələrinin koordinasiya mərkəzidir. Onun missiyası üzvləri vasitəsilə davamlı inkişafa yardım göstərilməsindən ibarətdir. 1976-cı ildə yaranan ADFIAP-ın hazırda 41 ölkədə 109 üzv müəssisəsi var.
Məqalə müəllifi ilə əlaqə ünvanı: [email protected]
