Azərbaycan, Bakı, 03 noyabr / Trend , müxbir İ.Xəlilova/
2009-cu ilin yekunlarına görə, Azərbaycanda kənd təsərrüfatı məhsulları istehsalının 4-5 faizlik artımı gözlənilir. Bu barədə kənd təsərrüfatı naziri İsmət Abbasov çərşənbə axşamı parlament komitələrinin iclasında "Dövlət büdcəsi - 2010" layihəsinin müzakirəsi zamanı bildirib.
"Dünyada baş verən proseslərə baxmayaraq, ölkənin aqrar sahəsində artım tendensiyasının saxlanılması son 5 il ərzində görülən tədbirlərin və kənd təsərrüfatı istehsalına dəstək üzrə imzalanan fərman və sərəncamların nəticəsidir", - nazir deyib.
2008-ci ildə kənd təsərrüfatı məhsullarının artımı 6,1 faiz, 2009-cu ilin doqquz ayı ərzində isə 3 faiz təşkil edib.
Gələn il dövlət büdcəsindən ayrılan vəsaitlərin artırılması da planlaşdırılır.
"Kənd təsərrüfatı məhsulları istehsalının artmasına baxmayaraq, hazırda istehsalçılar taxıl, meyvə və digər məhsuların satışı ilə bağlı problem yaşayırlar", - nazir deyib.
Onun fikrincə, bu problem regionlarda hərəsi 10 min ton olan 21 taxıl anbarının tikintisi nəticəsində öz həllini tapacaq. Anbarların inşası Sahiblkarlığa Kömək Milli Fondunun vəsaitləri hesabına həyata keçiriləcək. Bundan başqa, meyvə və tərəvəzlərin saxlanması üçün 15 soyuducu anbar kompleksi də yaradılacaq.
Hazırda Azərbaycanın aqrar sektorunda 1,5 milyon insan və ya ölkənin əmək qabiliyyəti olan əhalisinin 40 faizi işlə təmin olunub.
Məqalə müəllifi ilə əlaqə ünvanı: [email protected]
