Azərbaycan, Bakı, 23 noyabr / Trend , müxbir A.Bədəlova/
Bazar ertəsi Bakıda keçirilən Azərbaycan-Belçika biznes forumu ölkələr arasındakı ikitərəfli əlaqələrin möhkəmlənməsi yolunda atılan addım olacaq. Bu barədə İqtisadi İnkişaf Nazirliyi aparatının rəhbəri Samir Vəliyev forum zamanı deyib.
"Dünyada baş verən maliyyə böhranı Belçika və Azərbaycan əlaqələrinə təsir etməyib. Azərbaycanın digər ölkələrlə mal dövriyyəsində azalma müşahidə edilirsə, əksinə Belçika ilə mal dövriyyəsində artım müşahidə edilib", - Vəliyev deyib. 2009-cu ilin doqquz ayı ərzində iki ölkə arasında mal dövriyyəsi 2008-ci ilin müvafiq dövrü ilə müqayisədə 46 faiz artaraq 66 milyon dollara çatıb.
"Biznes əlaqələrinin inkişafı və ümumilikdə ikitərəfli əlaqələr üçün səmərəli şəraitin yaranmasını hesaba alsaq, bu o qədər də böyük göstərici deyil", - Vəliyev deyib.
Onun sözlərinə görə, 10 ay ərzində Azərbaycanda ÜDM-in artımı 8,3% təşkil edib və ölkənin bu cür inkişafının əsas səbəbi ugurla aparılan iqtisadi islahatlar, iqtisadiyyatın diversifikasiyası və iqtisadiyyatın qeyri-neft sektorunun inkişafıdır.
1994-cü ildən bu günə qədər ölkə iqtisadiyyatına qoyulan investisiyaların ümumi həcmi 70 milyard dolar təşkil edib. Bu məbləğin yarısından çoxu xarici investisiyaların payına düşür.
İxracın və İnvestisiyaların Təşviqi Fondunun (AZPROMO) prezident vəzifəsinin icraçısı Adil Məmmədov xarici investisiyalar üçün Azərbaycan iqtisadiyyatının daha cəlbedici sektorlarını açıqlayıb: kənd təsərrüfatı, qida sənayesi, alternativ enerji mənbələləri, turizm, xidmət sektoru, nəqliyyat, logistika, inşaat, kimya və yüngül sənaye və s.
"Azərbaycanda investisiya üçün çox səmərəli mühit mövcuddur, xarici sərmayədarların Azərbaycan iqtisadiyyatına öz invesiyalarını qoymalarının əsas səbəbi ölkənin zəngin təbii ehiyatları, səmərəli coğrafi vəziyyəti, infrastrukturun inkişafı və siyasi stabillikdir", - Məmmədov deyib.
Belçikadan 15, Azərbaycandan isə 40 şirkətin nümayəndələri forumda iştirak edir. Onlar kənd təsərrüfatı, neft-qaz sektoru, konsaltinq, inşaat və s. kimi sahələri təmsil edirlər.
Məqalə müəllifi ilə əlaqə ünvanı: [email protected]
