Azərbaycan, Bakı, 08 fevral / Trend , müxbir N.İsmayılova/
Azərbaycanın Əmlak Məsələləri Dövlət Komitəsi "Məişət Malları" Səhmdar Cəmiyyətinin 31,01 faiz səhmlərinin satışı üzrə investisiya müsabiqəsi elan edib. Bu müəssisə plastik kütlədən hazırlanmış məmulatlar istehsal edir.
Müsabiqədə Azərbaycanın həm fiziki, həm hüquqi şəxsləri, həmçinin də xarici investorlar iştirak edə bilər.
Müsabiqədə iştirak etmək üçün investorlar beynəlxalq və müasir tələblər səviyyəsində polietilen və polipropilen məhsulların istehsalı və emalına dair bir sıra şərtləri özündə cəmləşdirən, investisiya qoyuluşlarının istiqamətləri, məbləği və müddətləri göstərilməklə İnvestisiya Proqramını təqdim etməlidirlər.
İnvestisiya Proqramında səhmdar cəmiyyətinin səhmlərinin alqı-satqı müqaviləsi imzalandığı tarixdən 60 (altmış) gün müddətində təklif olunmuş investisiya həcminin ümumi məbləğinin müəyyən hissəsinin (5 (beş) %-ə qədərinin) pul vəsaiti şəklində səhmdar cəmiyyətinin hesablaşma hesabına köçürülməsi və ondan istifadəyə dair təkliflər də öz əksini tapmalı, dövlət büdcəsinə ödəniləcək 150 000 manat vəsaitdən az olmamaq şərtilə müvafiq təkliflər verməlidirlər.
"Məişət Malları" Səhmadar cəmiyyətinin əsas fəaliyyətini plastik kütlədən hazırlanmış məmulatlar, ətriyyat məhsulları, habelə kağız məmulatları və divar kağızlarının istehsalı və satışı təşkil edir.
Müsabiqədə iştirak etmək üçün ərizə və təkliflərin qəbulu 05 mart 2010-cu il tarixinədək, müsabiqə komissiyası tərəfindən təkliflərin qiymətləndirilməsi isə 10 mart 2010-cu il tarixindən başlayaraq həyata keçiriləcək.
Müəssisə 1930-cu ildən fəaliyyət göstərir. 1990-cı ildə istehsal prosesinin genişləndirilməsi məqsədi ilə əlavə olaraq yeni istehsal sahələri və inzibati binalar tikilərək istifadəyə verilib. 2010-cu il yanvarın 1-nə görə SC-nin istiqraz vərəqləri 184,695 min manat təşkil edir. Müəssisənin debitor borcu 20,05 manat təşkil edir. 2010-cu il yanvarın 1-nə görə müəssisənin nizamnamə kapitalı 2 665,774 min manat təşkil edir və o hər birinin nominal dəyəri 2 manat olan adi səhmlərə bölünüb.
Fevralın 8-nə olan rəsmi məzənnə 0,8034 AZN/USD təşkil edir.
