Azərbaycan, Bakı, 09 fevral / Trend , müxbir Ü.İsmayılova/
Azərbaycanın ən iri sığorta şirkətlərindən biri olan MBASK nizamnamə kapitalını iki dəfə artırır. Bunu çərşənbə axşamı şirkətin İdarə Heyətinin sədri Cəmil Məlikov deyib.
"Nizamnamə kapitalı 2 milyon manatdan 4 milyon manatadək artırılacaq", - Məlikov deyib.
Onun sözlərinə görə, nizamnamə kapitalı 2009-cu ildə əldə edilən gəlirlərin hesabına artırılacaq.
1992-ci ildən Azərbaycanın sığorta bazarında fəaliyyət göstərən MBASK SŞ dördü icbari olmaqla, 29 növ sığorta xidməti göstərir. Şirkətin nizamnamə kapitalı 2 milyon manat təşkil edir. 2005-ci ilin yanvar ayından MBASK səhmlərinin 30 faizi Avropa Yenidənqurma və İnkişaf Bankına məxsusdur. Onun əsas təsisçisi Unibank-dır.
2009-cu ildə MBASK sığorta şirkətinin haqları 7,556 milyon manat təşkil edib. 2008-ci ildə bu göstərici 18,55 milyon manat təşkil edib. Sığorta haqları üzrə 5,293 milyon manatlıq ödəmələr həyata keçirilib. 2008-ci ildə bu göstərici 5,96 milyon manat təşkil edib.
Fevralın 09-na olan rəsmi məzənnə 0,8034 AZN/USD təşkil edir.
