Mart ayının 2-də Almaniyanın BACK SHOP şirkətinə məxsus "Brot Haus" brendinin Bakıdakı şirniyyat evinin açılış mərasimi keçirildi. Mərasimdə şirkətin baş koordinatoru Mr.Simens və Azərbaycan Sahibkarlar Konfederasiyasının nümayəndəsi Emin Süleymanov iştirak edirdi. Tədbirə gələn qonaqlar və jurnalistlər qarşısında çıxış edən Mr.Simens son illərdə Azərbaycanın iqtisadiyyatında və həyatın digər sahələrində nəzərə çarpan inkişafın bu brendin Azərbaycana da gətirilməsinə səbəb olduğunu bildirdi: "Biz çox sevinirik ki, daha bir Alman brendi Azərbaycanda fəaliyyətə başlayacaq. Ümid edirik ki, buradakı fəaliyyətimiz uğurlu olacaq və biz xidmətlərimiz və məhsullarımızla Bakı sakinlərinin zövqünü oxşamağı bacaracağıq". Bundan əlavə, jurnalistlərin suallarını cavablandıran Mr.Simens şirkət haqqında ətraflı məlumat da verdi.
Qırmızı lentin kəsilməsi mərasimindən sonra qonaqlar və media nümayəndələri şirniyyat evinə daxil oldular, buradakı məhsullar və xidmət növləri ilə yaxından tanış oldular. Qeyd edək ki, Nizami küçəsi, 78 ünvanında yerləşən şirniyyat evi həm "Brot Haus" məhsullarının satış mərkəzi, həm də kafe kimi fəaliyyət göstərəcək. Şirkətin məhsullarının satışı isə yalnız burada həyata keçiriləcək.
Tədbir çərçivəsində baş tutan furşetdə qonaqlara "Brot Haus" məhsulları təqdim olundu və mağazanın ilk ziyarətçiləri yüksək Alman texnologiyaları ilə hazırlanmış bu şirniyyatları artıq dadmış oldular.
Trend-in ən mühüm və maraqlı xəbərlərini "Telegram"da izləyin
.jpg)
