Azərbaycan, Bakı, 12 aprel /Trend, müxbirlər Ü.Sadıxova, E.İsmayılov/
Azərbaycan və Suriya iki ölkənin mülki aviasiya administrasiyaları arasında aparılan danışıqların yekunu üzrə Dəməşq şəhərində qarşılıqlı anlaşmaya dair memorandum imzalayıblar. Bu barədə Azərbaycanın Suriyadakı səfirliyinin ikinci katibi Elnur Məmmədzadə bazar ertəsi bildirib.
Görüşün sonuna dair memorandumu Azərbaycan Dövlət Mülki Aviasiya Administrasiyasının direktor müavini Fuad Quliyev və Suriyanın Mülki Aviasiya Administrasiyası rəhbərinin müavini İyad Zaydan imzalayıb.
Məmmədzadənin sözlərinə görə, tərəflər hava nəqliyyatı və hava daşımaları sahəsində Azərbaycan və Suriya arasında sazişin imzalanması imkanlarını müzakirə ediblər. Sənədin imzalanması bu ilin may ayında Bakıda keçirilməsi planlaşdırılan hökumətlərarası komissiya çərçivəsində baş tuta bilər.
Həmin sazişin imzalanması tərəflər arasında hava daşımaları sahəsində hüquqi baza yaradacaq. Bu, həmçinin iki ölkə arasında həm ticari, həm də dövlət səviyyəsində reyslərin açılmasına imkan yaradacaq. "Əsas odur ki, hazırda həmin sahədə əməkdaşlıq üçün hüquqi baza yaradılır", - Məmmədzadə deyib.
