Azərbaycan, Bakı, 17 iyun /Trend, müxbir S.Süleymanov/
Almatıda İran İslam Respublikasının "Mahan Eyr" aviaşirkətinin Tehran - Almatı - Tehran marşrutu üzrə ilk reysinin təntənəli açılış mərasimi keçirilib. Bu barədə Trend-ə Qazaxıstanın Nəqliyyat və Kommunikasiyalar Nazirliyinin mətbuat xidmətindən məlumat verilib.
"Mahan Eyr" aviaşirkəti yuxarıda göstərilən reyslə "Eyrbas-310" hava gəmisi ilə həftədə 3 dəfə - çərşənbə, şənbə və bazar günləri uçuşlar həyata keçirməyi planlaşdırır.
"Təyyarənin göyərtəsində 196 oturacaq yeri var ki, onlardan 12-si bisnes-klassdır", - mətbuat xidmətinin məlumatında açıqlanır.
İdarədən, həmçinin, bildirilib ki, iyunun 16-da 5027 saylı birinci reys Tehran aeroportundan saat 13:00-da çıxıb və saat 18:00-da (yerli vaxtla) Almatı beynəlxalq aeroportunda yerə enib. Uçuş 3 saat 15 dəqiqə davam edib.
"Almatı "Mahan Eyr"in Tehran mərkəzi aeroportundan həyata keçirdiyi 15-ci beynəlxalq uçuşdur. "Mahan Eyr" aviaşirkəti sərnişinlərə Mahan-Eyr-Dubay, İstanbul, Düsseldorf və başqa müxtəlif beynəlxalq istiqamətlərə uzlaşdırılmış reyslər təklif edir", - mətbuat xidmətindən bildirilib.
"Mahan Eyr" aviaşirkəti İran İslam Respublikası tərəfindən təyinatlı daşıyıcıdır, Tehrandakı İmam Xomeyni beynəlxalq aeroportunda yerləşir. 2001-ci ildən IATA üzvüdür; İran daxilində və xaricə müntəzəm uçuşlar və çarter reysləri həyata keçirir. Aviaşirkətin donanması 24 hava gəmisindən, eləcə də А-320, А-310, А-300, B-747, MD-80 təyyarələrindən ibarətdir.
