Azərbaycan, Bakı, 18 iyun /Trend/
"Azərbaycan Dəmir Yolları" Qapalı Səhmdar Cəmiyyəti (QSC) dəmiryolun Şirvan-Astara hissəsində bərpa işlərinə başlayıb. Bu ərazidə mayın 9-dan başlayaraq Kür çayında suyun artması nəticəsində hərəkət dayandırılıb. Bu barədə cümə günü QSC-nin mətbuat katibi Nadir Əzməmmədov bildirib.
QSC rəhbərinin müavini Qurban Nəzirovun sözlərinə görə, cəmiyyət gücləndirilmiş rejimdə işləyir. Şirvan-Astara ərazisində təmir-bərpa işləri aparılır.
Suyun səviyyəsinin artması ilə əlaqədar dəmiryolun 15-ci kilometrliyində, Azadkənd-Salmanlı mənzilinin 19-cu, 21-ci (2 yerdə) və 24-cü kilometrliyində subasmanın qarşısını almaq və suyu digər istiqamətə ötürmək üçün dəmiryol yatağı 5 yerdən yarılıb. Sonradan yarılan yol yatağı xeyli genişlənib, həmin istiqamətdə 23 kilometrə yaxın yolun torpaq yatağı çökməyə məruz qalıb.
Təmir-bərpa işləri çox çətin şəraitdə aparılır. Lakin çətinlikərə baxmayaraq, Osmanlı-Azadkənd mənzilinin 15-ci kilometrliyində 30 metr, Azadkənd-Salmanlı mənzilinin 24-cü kilometrliyində isə 20 metr irəliləməyə müvəffəq olunub.
Osmanlı-Azadkənd arasında yolun 8 kilometrini bərpa etmək mümkün olub.
Suyun geriyə tam çəkilməməsi ilə əlaqədar olaraq, QSC-nin sanitar xidmətinin yerli təşkilatları hər gün bir neçə dəfə profilaktik işlər aparırlar. Osmanlı stansiyasında yaradılan tibb məntəqəsində dəmiryolçular müntəzəm şəkildə baxışdan keçirlər.
QSC-nin dəmiryolun Şivan-Osmanlı-Astara hissəsində fəlakətin nəticələrinin aradan qaldırılması üzrə planlarına iki 2000 millimetrlik dəmir-beton boruların tikintisi, yuxarı tikililərin (rels, şpal, bərkidici və ballast dirəklər) quraşdırılması, yolun 23-cü kilometrliyində çöküntünün aradan qaldırılması, hər birinin uzunluğu 10,5 metr, diametri 1,78 metr olan 6 ədəd metal borunun qoyulması, 38 kilometr uzunluğunda rabitə və 2 kilometr uzunluğunda siqnal kabellərinin və 8 kilometr məsafədə hava rabitə xəttinin yıxılmış ağac dirəklərinin dəyişdirilməsi daxildir.
Bu işlərin görülməsi üçün təbii fəlakət zonasına 1200 vaqon çınqıl, dəmir-beton məmulatları və iri daşlar göndərilib.
