Аzərbaycan, Bakı, 9 oktyabr /Trend, müxbir А.Axundov/
2010-cu ilin əvvəlindən Bakının ilkin mənzil bazarında qiymətlər 6 faiz ucuzlaşıb. Bu barədə cümə günü "MBA Group" konsaltinq şirkətinin baş direktori Nüsrət İbrahimov məlumat verib.
Ekspertin hesablamalarına görə, sentyabrda ilkin mənzil bazarında qiymətlər 0,9 faiz,yəni avqustdakı 783 dollardan 790 dollaradək aşağı düşüb. Qiymətlər ilin əvvəlindən altı faiz, ötən ilin analoji dövrü ilə müqayisədə 7,1 faiz ucuzlaşıb.
Sentyabr ayı ərzində təkrar mənzil bazarında qiymətlər 2,8 faiz, yəni bir kvadratmetri 1 322 dollardan 1 285 dollaradək ucuzlaşıb. Qiymətlər ilin əvvəlindən 5,9 faiz, ötən ilin analoji dövrü ilə müqayisədə 5,2 faiz ucuzlaşıb.
Sentyabrda kommersiya obyektləri bazarında qiymətlər 0,6 faiz, yəni bir kvadratmetri 3 190 dollardan 3 210 dollaradək qalxıb. Qiymətlər ilin əvvəlindən 6,7 faiz, ötən ilin analoji dövrü ilə müqayisədə 6,6 faiz ucuzlaşıb.
Bakının torpaq bazarında qiymətlər ötən ay cüzi bahalaşıb. Belə ki, torpağın bir sotu 16 080 dollardan 16 310 dollaradək bahalaşıb. Qiymətlər ilin əvvəlindən 4,9 faiz, ötən ilin analoji dövrü ilə müqayisədə 8,4 faiz ucuzlaşıb.