Azərbaycan, Bakı, 22 noyabr /Trend, müxbir A.Axundov/
2011-ci ildə Azərbaycanın sığorta bazarında artım gözlənilir. Bu barədə bazar ertəsi Trend-ə "Xalq Sığorta" şirkətinin idarə heyətinin sədri Əli Əkbər Tahiri bildirib.
"İndi bazarda vəziyyət normaldır. Gələn il artım gözləyirik", - Tahiri bildirib.
Azərbaycanın Maliyyə Nazirliyinin Dövlət Sığorta Nəzarəti Xidmətinin (DSNX) məlumatına görə, yanvar-oktyabr aylarında Azərbaycanın sığorta şirkətlərinin sığorta haqları yığımının ümumi həcmi 130,3 milyon manat, ödəmələri 41,27 milyon manat təşkil edib.
Ötən ilin analoji dövrü ilə müqayisədə, sığorta haqlarının ümumi həcmi 5,85 faiz (2009-cu ilin yanvar-oktyabrında 138,41 milyon manat səviyyəsində olub), ödəmələr 1,94 faiz (42,09 milyon manat) azalıb.
Tahirinin sözlərinə görə, şirkət DSNX-nin sığorta şirkətlərinin məcmu kapitalının minimum səviyyəsinin artırılmasına yönəldilən tədbirlərini tam dəstəkləyir.
"Bazardakı vəziyyətdən çıxış edərək, DSNX-nin tədbirlərini düzgün hesab edirəm", - Tahiri bildirib.
Sığorta şirkətlərinin kapitalı üzrə təsdiqlənmiş tələblərə görə, 2010-cu il yanvarın 1-dən sığorta şirkətlərinin kapitalı iki milyon manatadək, təkrar sığorta şirkətlərinin kaplitalı isə dörd milyon manatadək, 2011-ci il yanvarın 1-dən müvafiq olaraq 3,5 milyon manata və yeddi milyon manatadək, 2012-ci il yanvarın 1-dən müvafiq olaraq 5 milyon manata və 10 milyon manatadək artırılmalıdır.
"Xalq Sığorta" şirkətinin nizamnamə kapitalı 21,061 milyon manat təşkil edir.
Azərbaycanda 27 sığorta şirkəti və bir təkrar sığorta şirkəti fəaliyyət göstərir.
Noyabrın 22-nə rəsmi məzənnə 0,7997 AZN/USD təşkil edir.
