Azərbaycan, Bakı, 23 dekabr /Trend, müxbir N.İsmayılova/
Azərbaycan bankı "RoyalBank" nağdsız ödənişlərin payının və "Internet Banking" istifadəçilərinin sayının artmasının stimullaşdırılması üzrə işi fəallaşdırır. Bu barədə cümə axşamı bank yanında fəaliyyət göstərən "RoyalCard" prosessinq mərkəzinin layihə meneceri Nadir Şükürov deyib.
"Bu günə bankın kart sahiblərinin 80 faizi "retail" və "internet-bankinq" xidmətlərindən istifadə edirlər", - o qeyd edib.
Onun sözlərinə görə, bankın məqsədi nağd olmayan hesablaşmaların həcminin 99 faizə qədər çatdırılmasıdır.
"Orta hesabla bankın bir plastik kartının payına gündə bir tranzaksiya düşür, lakin biz hesab edirik ki, bu, kifayət deyil və artım üçün potensial var", - o əlavə edib.
"RoyalBank" "RoyalCard" prosessinq mərkəzinin VISA Int (VISA) beynəlxalq ödəniş sistemlərinə birbaşa qoşulmaq üzrə sertifikasiyadan keçib, eləcə də MasterCard Worldwide (MasterCard), JCB və CUP (Union Pay) sistemlərinə birbaşa qoşulma layihəsi üzrə sonuncu mərhələdədir.
"RoyalBank" Azərbaycanda fəaliyyət göstərən, Bakı və ölkə rayonlarında 32 filialı olan kommersiya bankıdır. O, 1993-cü il avqustun 2-də "ÖzBank"ın birgə kommersiya bankı kimi təsis edilib.
Hazırda Azərbaycanda 5 prosessinq mərkəzi fəaliyyət göstərir. Bunlar "AzeriCard", "MilliKart", "TexKart", "RoyalCard" və "KapitalBank" prosessinqdir.
