Azərbaycan, Bakı, 28 dekabr /Trend, müxbir N.İsmayılova/
2011-ci ildə Azərbaycanda özəl vergi məsləhəti xidməti haqqında qanun layihəsi hazırlanacaq. Bu barədə çərşənbə axşamı Vergilər Nazirliyi Vergi Siyasəti və Starteji Araşdırmalar Baş İdarəsinin şöbə müdiri Vüsal Şıxəliyev deyib.
"Vergilər Nazirliyinin 2011-ci il üçün dövlət büdcəsinin yerinə yetirilməsi çərçivəsində nazirlik qarşısında qoyulan vəzifələrin yerinə yetirilməsi ilə bağlı planına əsasən, özəl vergi məsləhəti xidməti haqqında qanun layihəsinin hazırlanması planlaşdırılır", - Şıxəliyev qeyd edib.
Onun sözlərinə görə, ölkədə artıq belə xidmətlər təklif edən böyük beynəlxalq konsaltinq şirkətləri fəaliyyət göstərir.
Şıxəliyevin dediyinə görə, bu sahədə lazımi normativ-hüquqi bazanın yaradılması onunla əlaqədardır ki, həm özəl vergi xidmətləri təqdim edən şirkətlərin, həm də sifarişçilərin hüquq və vəzifələrini dəqiq müəyyənləşdirmək lazımdır.
Onun sözlərinə görə, 2011-ci iln martına kimi ölkədə vergi qanunvericiliyinin təkmilləşdirilməsi məqsədilə Vergi Məcəlləsinə dəyişiklik və əlavələrin edilməsi üzrə layihələr də hazırlanacaq.
