Azərbaycan, Bakı, 19 fevral /Trend, müxbir N.İsmayılova/
Dünya Bankı (DB) 2011-ci ildə Azərbaycanda təhsil sistemində islahatların aparılması və onun təkmilləşdirilməsi üzrə yeni layihənin həyata keçirilməsinə başlamağa ümid edir. Trend-in məlumatına görə, bu barədə bankın Bakıdakı nümayəndəliyinin rəhbəri Cozef Ouen bildirib.
"İndi biz artıq ölkə hökuməti ilə danışıqlara başlamışıq, lakin müzakirələr hələ çox erkən mərhələdədir", - Ouen deyib.
Yanvarın 31-dən fevralın 5-dək bankın Cənubi Qafqazda sosial sektor üzrə əlaqələndiricisi Meskerem Mulatunun başçılığı ilə DB-nin missiyası Təhsil Nazirliyi ilə təhsil sistemində islahatların aparılması və təkmilləşdirilməsi üzrə tədbirlərin müəyyənləşdirilməsi məqsədilə danışqılar aparmaq üçün ölkədə olub.
Ötən ilin sonunda DB Azərbaycanla yeni strateji əməkdaşlıq proqramını təsdiq edib. O, 2011-2014-cü illər üçün nəzərdə tutulub və Azərbaycana kömək göstərilməsi üzrə əsas sənəd olacaq.
Yeni strategiya Azərbaycan hökumətinin özü üçün müəyyən etdiyi öhdəliklərə əsaslanır. "Diqqəti cəlb edəcək əsas istiqamətlər" arasında "iqtisadiyyatın qeyri-neft sektorunun möhkəmləndirilməsi, eləcə də kənd təsərrüfatı və infrastrukturun inkişafı" xatırladılır. Bununla yanaşı, söhbət "sosial xidmətlərin səmərəliliyinin, eləcə də səhiyyə, təhsil, sosial müdafiə və su təchizatının gücləndirilməsi"ndən gedir.
Ölkənin 1992-ci ildə Beynəlxalq Yenidənqurma və İnkişaf Bankına və 1995-ci ildə Beynəlxalq İnkişaf Assosiasiyasına qoşulmasından sonra Dünya Bankının Azərbaycan qarşısında öhdəlikləri 43 layihə üçün təxminən 3 milyard ABŞ dolları təşkil edib. Azərbaycanın 1995-ci ildə qoşulmasından sonra IFC-nin öhdəlikləri 45 layihə üçün demək olar ki, 350 milyon ABŞ dollar təşkil edir.
Hazırda bank ümumi dəyəri orta hesabla iki milyon dollar olan 20 layihəni maliyyələşdirir. Bu layihələr nəqliyyat, su və kanalizasiya sektorunu, kənd təsərrüfatı və irriqasiyanı, səhiyyə və təhsili əhatə edir.
