Qazaxıstan, Astana, 14 mart /Trend, müxbir A.Maratov/
Qazaxıstanın islami maliyyələşmənin inkişafı üzrə təcrübəsi Mərkəzi Asiya regionu ölkələrində maraq doğurur. Bu barədə Almatı Regional maliyyə mərkəzinin fəaliyyətinin tənzimlənməsi üzrə Agentliyin rəhbəri Arken Arıstanov bazar ertəsi Astanada İslami maliyyələşmə üzrə II konfransında çıxışı zamanı deyib.
"Hazırda biz Bəhreyn, Küveyt, Birləşmiş Ərəb Əmirlikləri, Səudiyyə Ərəbistanı kimi ölkələrin maliyyə institutları və digər potensial tərəfdaşlarla əlaqələr qururuq. Bizim fəaliyyətimiz bu istiqamətdə Azərbaycan, Qırğızıstan və Tatarıstanda böyük maraq doğurur", - Arıstanov qeyd edib.
O xatırladıb ki, Aşqabad, Bakı və Qazanda aiddiyyəti qurumların nümayəndələrinin iştirakı ilə görüşlər keçirilib. Arıstanov izah edib ki, Rusiya, Azərbaycan və Qırğızıstanda qanunvericilik bazası hələ ki islami maliyyələşməni inkişaf etdirməyə imkan vermir.
"Biz ümid edirik ki, birgə səylərlə bütün dünyada islami maliyyələşmənin inkişafına töhfə verə biləcəyik", - Arsıtanov qeyd edib.
Bundan əvvəl Baş nazirinin müşaviri - sənaye və yeni texnologiyalar naziri Yerlan Baydaulet bildirib ki, MDB məkanında yalnız Qazaxıstanda islami maliyyələşmənin inkişafı üzrə işlər mütəmadi aparılır - qüvvədə olan qanunlara əlavə və dəyişikliklər edilib və yeni qanunların tətbiqi planlaşdırılır.
"Bütün MDB məkanında hələlik yalnız Qazaxıstan müvafiq qərar qəbul edib, MDB-nin digər ölkələrində isə islam maliyyə institutları indiki qanunvericiliyə əsaslanaraq işə başlayıblar, buna görə də bir sıra ayrı əməliyyatlar aparırlar. Məsələn, Azərbaycanda indiki qanunvericilik çərçivəsində işləyən İslam İnvestisiya Şirkəti, İslam Lizinq Şirkəti, İslam Bankı yaradılıb", - Baydaulet bildirib.
