Azərbaycan, Bakı, 15 mart /Trend, müxbir Ü.İsmayılova/
Martın 1-nə olan vəziyyətə görə, Azərbaycanda rəsmi olaraq 39,5 min nəfər işsiz kimi qeydiyyatdan keçib, işsizlərin 43,4 faizi qadındır. Bu barədə çərşənbə axşamı Dövlət Statistika Komitəsindən məlumat veriblər. Ölkədə bir vakant iş yerinə dörd işsiz iddialıdır.
Hesabat dövrü ərzində ölkənin əmək qabiliyyətli əhalisinin sayı 4565,8 min nəfər təşkil edib. Bunun 4331,1 min nəfəri və ya 94,9 faizi ölkə iqtisadiyyatının müxtəlif sahələrində çalışır. Yanvar ayı üzrə muzdla işləyənlərin sayı 1330,9 min nəfər olub. Muzdla çalışanların ümumi sayından (1350,1 min nəfər) 836 mini dövlət sektorunda, 494,9 min nəfəri isə özəl sektorda çalışır.
Bununla yanaşı, hesabat dövründə 36,4 min nəfər iqtisadiyyatın neft sektorunda, 1294,5 min nəfər qeyri-neft sektorunda və 1291,6 min nəfər ölkə iqtisadiyyatının kənd təsərrüfatı sektorunda çalışır.
İstehsalat sahəsində muzdla çalışanların 20,4 faizi sənaye, 2,6 faizi hasilat, 5,8 faizi emal sənayesi, 2,3 faizi elektrik enerjisi, qaz sahəsində, 1,7 faizi su təchizatı, çirkab suların təmizlənməsi, 5 faizi tikintidə, 3 faizi kənd və meşə təsərrüfatı, balıqçılıq sahəsində çalışır.
Xidmət sahəsinə gəlincə, bu sahədə çalışanların 25,8 faizi təhsil, 20,1 faizi topdan satış və pərakəndə ticarət, avtomobillərin, məişət avadanlıqlarının təmiri, 10,1 faizi səhiyyə və sosial xidmətlər, 4,7 faizi nəqliyyat sahəsində, 4,1 faizi istirahət, əyləncə və mədəniyyət, 4 faizi dövlət idarəetməsi və müdafiə sahəsi, icbari sosial təminat, 3,2 faizi peşə, elmi və texniki fəaliyyət, 1,8 faizi informasiya və rabitə, 1,3 faizi maliyyə və sığorta, 1,6 faizi inzibati xidmət göstərilməsi, 1,3 faizi turizm və ictimai iaşə xidməti sahəsində, 0,9 faizi isə digər sahələrdə çalışır.
İşsizliyə görə müavinətin orta məbləği 190,7 manatdır.
Martın 15-nə olan rəsmi məzənnə 0,7933 AZN/USD təşkil edir.
