Azərbaycan, Bakı, 18 mart /Trend, müxbir Ü.İsmayılova/
Azərbaycan Səhiyyə Nazirliyinin Respublika Gigiyena və Epidemiologiya Mərkəzi və Beynəlxalq Maliyyə Korporasiyası (BMK) dövlət sanitariya nəzarətinin təkmilləşdirilməsi istiqamətində bir sıra sənədlərin layihələrinin hazırlanmasına başlayıblar. Trend-in məlumatına görə, bu barədə Səhiyyə Nazirliyinin cümə günü yaydığı məlumatda deyilir.
"Birgə işlər əvvəllər bağlanmış müqaviləyə uyğun olaraq aparılır", - məlumatda deyilir.
Məlumata əsasən, "Dövlət sanitariya-epidemioloji xidməti tərəfindən tikinti, yenidənqurma, yenidənplanlaşdırma, təkmilləşdirmə və yeni texnika ilə təchiz edilmə layihələrinə rəy verilməsi qaydaları" və "Dövlət sanitariya-epidemioloji xidməti tərəfindən qeyri-yaşayış sahələrində yaradılan müxtəliftəyinatlı obyektlərin fəaliyyətinin razılaşdırılması barədə rəyin verilməsi qaydaları"nın layihələri hazırlanaraq Səhiyyə Nazirliyinə təqdim edilib.