Azərbaycan, Bakı, 29 mart /Trend, müxbir N.İsmayılova/
Azərbaycan bankı "DəmirBank" beynəlxalq maliyyə institutları və investisiya fondlarından 25 milyon dollar həcmində sindikatlaşdırılmış kredit cəlb edir. Trend-in məlumatına görə, bu barədə çərşənbə axşamı jurnalistlərə bankın idarə heyətinin sədri Roman Əmircanov məlumat verib.
"Vəsait bankın mikromaliyyə və kiçik və orta sahibkarlıq kimi müxtəlif biznes istiqamətlərinin maliyyələşdirilməsinə yönəldiləcək", - Əmircanov bildirib.
Onun sözlərinə görə, sindikatlaşdırılmış kredit çərçivəsində verilən kredit xətlərinin müddəti iki ildən beş ilədəkdir. Kredit Niderland İnkişaf Maliyyə Şirkətinin (FMO) xətti ilə veriləcək.
"Həcmi bank kapitalının 10 faizindən çox olan vəsaitlərin cəlb olunması zamanı əvvəlcə bank səhmdarlarının razılığını almaq vacibdir. Bununla əlaqədar apreldə bank səhmdarlarının növbədənkənar toplantısının keçirilməsi planlaşdırılır", - Əmircanov deyib.
Bank səhmdarlarının növbədənkənar toplantısının aprelin 20-də bankın baş ofisində keçirilməsi planlaşdırılıb.
Ölkənin ilk banklarından olan "DəmirBank" (əvvəlki adı Azərdəmiryolbank) 1989-cu ildə fəaliyyətə başlayıb. Bankın səhmdarları sırasına beynəlxalq maliyyə təşkilatları olan Avropa Yenidənqurma və İnkişaf Bankı və Niderland İnkişaf Maliyyə Şirkəti daxildir.
